ប្រទេសអង់គ្លេស បញ្ចាំងរូបភាពមហាក្សត្រីរបស់ពួកគេ ទៅលើបណ្ដុំផ្ទាំងថ្មបុរាណ Stonehenge ក្នុងទិវាខួបគម្រប់ ៧០ ឆ្នាំនៃការគ្រងរាជសម្បត្តិរបស់មហាក្សត្រីអង្គនេះ ប៉ុន្តែ ទង្វើនេះទទួលបានការជំទាស់ពីសាធារណមតិ។
ការសម្រេចចិត្តបញ្ចាំងរូបភាពរបស់ មហាក្សត្រិយានី Elizabeth II ទៅលើផ្ទាំងថ្មបុរាណ Stonehenge ដែលមានអាយុកាល ៥,០០០ ឆ្នាំនេះ ត្រូវបានក្រុមអ្នករៀបចំព្រឹត្តិការណ៍នេះហៅថា «ការគោរពប្រកបដោយវេទមន្ត»។
ក៏ប៉ុន្តែ អ្នកលេងបណ្ដាញសង្គមមួយចំនួនមានមតិថា បណ្ដុំផ្ទាំងសិលាបុរាណ Stonehenge នៅ Wiltshire នៃ ប្រទេសអង់គ្លេស គួរតែត្រូវបានរក្សាទ្រង់ទ្រាយដើម ព្រោះតែនេះគឺជាទីតាំងសាសនាបុរាណ ខណៈដែលអ្នកខ្លះទៀតបានបញ្ចេញប្រតិកម្មធ្ងន់ធ្ងរជាងនេះ ដោយសរសេរថា ពិតជាសកម្មភាពគួរឱ្យ «ពិបាកទ្រាំ» នៅពេលប្រែក្លាយវត្ថុបុរាណឱ្យទៅជាផ្ទាំងផ្សាយពាណិជ្ជកម្ម។
ទោះជាយ៉ាងណាក៏ដោយ ក៏នៅមានមនុស្សជាច្រើនដែលបង្ហាញភាពរីករាយជាមួយនឹងគំនិតប្លែកខាងលើ។
មានមតិជាច្រើនលើកឡើងថា បណ្ដុំផ្ទាំងថ្មបុរាណ Stonehenge ត្រូវបានកសាងឡើងក្នុងអំឡុងពីឆ្នាំ ៣០០០ ដល់ឆ្នាំ ១៥២០ មុនគ្រិស្តសករាជ។ គោលបំណងនៃការកសាងបណ្ដុំថ្មបុរាណនេះ មិនទាន់ត្រូវបានគេដឹងច្បាស់នៅឡើយ ប៉ុន្តែ អាជ្ញាធរគ្រប់គ្រងបេតិកភណ្ឌរបស់ អង់គ្លេស English Heritage សន្មតថា «ប្រាកដជាមានមូលហេតុដែលទាក់ទងនឹងព្រលឹងវិញ្ញាណ (ឬផ្លូវងងឹត) ទើបមនុស្សនៅក្នុងយុគសម័យថ្ម និងស្ពាន់ ខំប្រឹងកសាងវាឡើងដូច្នេះ»។
English Heritage មិនបានឆ្លើយតបទៅនឹងប្រតិកម្មរបស់សាធារណជន ប៉ុន្តែបានឱ្យដឹងថា ពួកគេធ្លាប់បានបញ្ចាំងរូបភាពទៅលើបណ្ដុំផ្ទាំងសិលា Stonehenge ច្រើនលើកមកហើយ។ ឆ្នាំ ២០២០ ផ្ទៃមុខរបស់បុគ្គល ៨ រូបដែលបានចូលរួមជួយដល់វិស័យសិល្បៈ និងបេតិកភណ្ឌអង់គ្លេសក្នុងសម័យកូវីដ-១៩ ត្រូវបានបញ្ចាំងលើបណ្ដុំផ្ទាំងសិលា Stonehenge។ ឆ្នាំ ២០១៤ រូបភាពទាហានក្នុងសម័យសង្គ្រាមលោកលើកទីមួយក៏ត្រូវបានបញ្ចាំងលើផ្ទាំងថ្មទាំងនេះដើម្បីជាផ្នែកមួយនៃទិវារំឭកវិញ្ញាណក្ខន្ធ។
មហាព្រឹត្តិការណ៍ខួប ៧០ ឆ្នាំនៃការគ្រងរាជ្យសម្បត្តិរបស់មហាក្សត្រិយនីអង់គ្លេស ត្រូវបានប្រារព្ធឡើងរយៈពេល ៤ ថ្ងៃ ចាប់ពីថ្ងៃទី ០២ មិថុនា ដល់ ៥ មិថុនា ក្នុងនោះក៏មានពិធីប្រគំតន្ត្រី និងព្យុហយាត្រា Trooping the Colour របស់ កងទ័ពអង់គ្លេស ផងដែរ។
