ក្រុមមន្ត្រីនៅតំបន់ Kherson ភាគខាងត្បូងអ៊ុយក្រែន គ្រោងនឹងបង្រួបបង្រួមទាំងស្រុងដើម្បីក្លាយជាផ្នែកមួយនៃទឹកដីផ្លូវការរបស់ រុស្ស៊ី ក្នុងអនាគតដ៏ខ្លីខាងមុខ។
Kirill Stremousov អភិបាលរងនៃរដ្ឋបាលយោធា-ស៊ីវិលរបស់តំបន់ Kherson កាលពីម្សិលមិញបានបង្ហើបប្រាប់ទីភ្នាក់ងារសារព័ត៌មាន TASS អំពីគម្រោងច្របាច់បញ្ចូលទឹកដីនេះទៅក្នុង សហព័ន្ធរុស្ស៊ី។ «តំបន់ Kherson គ្រោងនឹងចូលជាសមាជិកសហព័ន្ធរុស្ស៊ី ក្នុងអនាគតដ៏ខ្លីខាងមុខ ក្លាយជាផ្នែកមួយនៃទឹកដីផ្លូវការរបស់ រុស្ស៊ី» មន្ត្រីរូបនេះនិយាយដូច្នេះ។
កាលពីដើមខែនេះ មន្ត្រីនៅ Kherson ក៏ធ្លាប់បានឱ្យដឹងអំពីបំណងច្របាច់បញ្ចូលទៅក្នុងទឹកដីរបស់ រុស្ស៊ី ដោយនិយាយថា «មុនដំណាច់ឆ្នាំនេះ Kherson នឹងស្ថិតក្រោមការគ្រប់គ្រងទាំងស្រុងដោយច្បាប់របស់ រុស្ស៊ី»។ ពួកគេនិយាយថា នឹងបញ្ជូនសំណើទៅកាន់ប្រធានាធិបតី វ្ល៉ាឌីមៀ ពូទីន ដោយមិនចាំបាច់ធ្វើប្រជាមតិ។
មន្ត្រីភាគីខាងអ៊ុយក្រែន មិនទាន់មានប្រតិកម្មអ្វីនៅឡើយ ទាក់ទិននឹងព័ត៌មានខាងលើ។
