អ៊ុយក្រែន ទាត់ចោលបទបញ្ជាឈប់បាញ់ ឬការធ្វើសម្បទានទឹកដីណាមួយចំពោះ រុស្ស៊ី ជាដាច់ខាត នៅពេលដែល មូស្គូ បង្កើនការវាយប្រហារនៅភាគខាងកើត និងខាងត្បូងប្រទេសនេះ។
គោលជំហររបស់ ទីក្រុងកៀវ កាន់តែមានការប្ដេជ្ញាខ្ពស់ពីមួយថ្ងៃទៅមួយថ្ងៃក្នុងប៉ុន្មានសប្ដាហ៍ចុងក្រោយនេះ នៅពេលដែល រុស្ស៊ី ជួបឧបសគ្គនៅតំបន់ភាគខាងកើតរបស់ អ៊ុយក្រែន ហើយក្រុមមន្ត្រីប្រទេសនេះព្រួយបារម្ភថា ពួកគេអាចត្រូវបង្ខំឱ្យបោះបង់ទឹកដីមួយចំនួនដើម្បីប្ដូរយកកិច្ចព្រមព្រៀងសន្តិភាព។
«សង្គ្រាមត្រូវតែបញ្ចប់ដោយ អ៊ុយក្រែន យកមកវិញនូវបូរណភាព និងអធិបតេយ្យភាពទឹកដីទាំងស្រុង» ប្រធានការិយាល័យប្រធានាធិបតីអ៊ុយក្រែន Andriy Yermak បង្ហោះសារលើបណ្ដាញសង្គម Twitter កាលពីថ្ងៃទី ២២ ឧសភា ២០២២។
Mykhailo Podolyak អ្នកចរចាថ្នាក់កំពូល និងជាទីប្រឹក្សារបស់ប្រធានាធិបតី ហ្សេឡែនស្គី កាលពីថ្ងៃទី ២១ ឧសភា បានទាត់ចោលលទ្ធភាពដែលថា អ៊ុយក្រែន ធ្វើសម្បទានទឹកដី ក៏ដូចជាការអំពាវនាវឱ្យឈប់បាញ់ជាបន្ទាន់ ដោយថ្លែងថា ប្រការទាំងនោះគឺមានន័យថា កងទ័ពរុស្ស៊ី នឹងស្ថិតនៅក្នុងតំបន់នានានៃទឹកដីរបស់ អ៊ុយក្រែន ដែលពួកគេកំពុងកាន់កាប់ នេះគឺជាប្រការដែល ទីក្រុងកៀវ មិនអាចទទួលយកបាន។
«កងកម្លាំងរុស្ស៊ី ត្រូវតែចាកចេញពីទឹកដី ហើយក្រោយមក ដំណើរការសន្តិភាពអាចត្រូវបានតភ្ជាប់ឡើងវិញ» Podolyak ប្រាប់សារព័ត៌មាន Reuters ដូច្នេះ និងបញ្ជាក់ថា ការធ្វើសម្បទាននឹងមិនមានប្រសិទ្ធភាព ព្រោះថា រុស្ស៊ី នឹងឆ្លៀកយកឱកាសនោះដើម្បីពង្រឹងខ្លួនឱ្យខ្លាំងក្លាជាងមុន។
