មហាសេដ្ឋីអាម៉េរិក លោក Elon Musk ឱ្យដឹងថា ក្នុងនាមជាម្ចាស់ Twitter លោកនឹងដកបម្រាមរបស់បណ្ដាញសង្គម Twitter ដែលបានហាមលោក Donald Trump ប្រើប្រាស់បណ្ដាញសង្គមនេះ។
«ខ្ញុំនឹងប្រែក្រឡាស់បម្រាមនេះជារៀងរហូត» លោក Musk ថ្លែងដូច្នេះនៅក្នុងកិច្ចប្រជុំមួយរបស់ Financial Times កាលពីថ្ងៃទី ១០ ឧសភា។ លោកបានសង្កត់ធ្ងន់ថា បច្ចុប្បន្ន លោកមិនទាន់ក្លាយជាម្ចាស់ Twitter ទើបប្រការនេះមិនទាន់ប្រាកដថានឹងកើតឡើងនៅឡើយ។
ការទិញដូរ Twitter ក្នុងតម្លៃ ៤៤ ពាន់លានដុល្លារ របស់នាយកប្រតិបត្តិរបស់ Tesla កំពុងស្ថិតក្នុងការរង់ចាំការគាំទ្រពីភាគហ៊ុនិក និងអាជ្ញាធរអាម៉េរិក។ ក៏ប៉ុន្តែ លោក Musk ធ្លាប់និយាយច្រើនលើកហើយថា នឹងកាត់បន្ថយការត្រួតពិនិត្យខ្លឹមសារ ឬដាក់ការហាមឃាត់ប្រើប្រាស់បណ្ដោះអាសន្ន ជំនួសឱ្យការហាមឃាត់ជារៀងរហូត។
លោក Donald Trump ត្រូវបានដកហូតសិទ្ធិប្រើប្រាស់ Twitter និងបណ្ដាញសង្គមមួយចំនួនទៀត បន្ទាប់ពីសារ និងសម្ដីរបស់លោក ដែលបានបង្ហោះលើបណ្ដាញសង្គម ត្រូវបានគេគិត បានជំរុញឱ្យមានស្ថានការណ៍ច្របូកច្របល់នៅ Capitol Hill ដែលជាតំបន់មានស្ថាប័នរដ្ឋសំខាន់ៗ កាលពីខែមករា ឆ្នាំ ២០២១ ដើម្បីទប់ស្កាត់ជ័យជម្នះរបស់លោក Biden បន្ទាប់ពីការបោះឆ្នោត។
មុននោះ អតីតប្រធានាធិបតីអាម៉េរិក លោក Trump ក៏បានប្រកាសថា នឹងមិនត្រលប់មកប្រើប្រាស់ Twitter ឡើយ បើទោះជាត្រូវបានអនុញ្ញាត។ ជំនួសមកវិញ លោកនឹងប្រើប្រាស់បណ្ដាញសង្គមផ្ទាល់ខ្លួន (Truthsocial) ទោះបីជានៅពេលនេះវាមិនទាន់ទាក់ទាញអ្នកប្រើប្រាស់បានច្រើនក៏ដោយ៕
