កងកម្លាំងយោធារបស់ សហរដ្ឋអាម៉េរិក កំពុងជួយបណ្ដុះបណ្ដាលទាហានរបស់ អ៊ុយក្រែន ឱ្យចេះប្រើប្រាស់សព្វាវុធទំនើបៗ នៅ ប្រទេសអាល្លឺម៉ង់ ដើម្បីត្រៀមចូលប្រយុទ្ធប្រឆាំងនឹង កងទ័ពរុស្ស៊ី នៅ អ៊ុយក្រែន។
សារព័ត៌មាន Deutsche Welle (អាល្លឺម៉ង់) ថ្មីៗនេះបានដកស្រង់សម្ដីអ្នកនាំពាក្យរបស់ មន្ទីរបញ្ចកោណ John Kirby ឱ្យដឹងថា ពួកគេកំពុងបង្វឹក និងជួយដល់ទាហានរបស់ អ៊ុយក្រែន ឱ្យចេះប្រើប្រាស់ប្រព័ន្ធអាវុធទំនើបៗនៅក្នុង ប្រទេសអាល្លឺម៉ង់។
យោងតាមលោក Kirby ទាហានអ៊ុយក្រែន ប្រហែល ៥០ នាក់ បានទទួលការបណ្ដុះបណ្ដាលវិធីប្រើប្រាស់ប្រភេទអាវុធបាញ់បានឆ្ងាយ។ សិក្ខាកាមក៏នឹងត្រូវបានបង្ហាត់អំពីការប្រើប្រាស់រ៉ាដា និងរថពាសដែកផងដែរ។ កម្មវិធីបណ្ដុះបណ្ដាលនេះ ក៏មានកិច្ចសហការរបស់ រដ្ឋាភិបាលអាល្លឺម៉ង់។
អង្គភាពការពារជាតិរបស់រដ្ឋ Florida នៃ សហរដ្ឋអាម៉េរិក ត្រូវបានប្រគល់ភារកិច្ចក្នុងការបណ្ដុះបណ្ដាលទាហានរបស់ អ៊ុយក្រែន នៅ អាល្លឺម៉ង់។
អ្នកនាំពាក្យរបស់ មន្ទីរបញ្ចកោណ ក៏បាននិយាយថា ការបណ្ដុះបណ្ដាលដូចគ្នានេះក៏កំពុងត្រូវបានធ្វើឡើងនៅតំបន់ផ្សេងៗរបស់ អឺរ៉ុប ប៉ុន្តែមិនបានបង្ហើបឱ្យដឹងអំពីទីតាំងជាក់លាក់។
