សភាអាម៉េរិក អនុម័តច្បាប់ដើម្បីធ្វើឱ្យរស់ឡើងវិញនូវកម្មវិធីដែលធ្លាប់ត្រូវបានអនុវត្តក្នុងសង្គ្រាមលោកលើកទី ២ បំណងធ្វើឱ្យការផ្ដល់ជំនួយយោធាដល់ អ៊ុយក្រែន មានដំណើរការរលូត និងឆាប់រហ័ស។
សភាជាន់ទាបអាម៉េរិក កាលពីថ្ងៃទី ២៨ មេសា ឆ្នាំ ២០២២ បានអនុម័តលើសេចក្ដីព្រាងនៃ «ច្បាប់ឱ្យខ្ចី-ឱ្យជួល ការពារប្រជាធិបតេយ្យអ៊ុយក្រែន ២០២២» ដោយមាន ៤១៧ សំឡេងគាំទ្រ និង ១០ សំឡេងប្រឆាំង បន្ទាប់ពីសេចក្ដីព្រាងច្បាប់នេះត្រូវបានសភាជាន់ខ្ពស់អាម៉េរិក អនុម័តរួចកាលពីប៉ុន្មានថ្ងៃមុន។ សេចក្ដីព្រាងច្បាប់នឹងត្រូវបានបញ្ជូនទៅកាន់ សេតវិមាន ដើម្បី ប្រធានាធិបតី ចូ បៃដិន ចុះហត្ថលេខាចុងក្រោយ។
ក្រោយពីលោក បៃដិន បានចុះហត្ថលេខារួច ច្បាប់នេះនឹងធ្វើឱ្យកម្មវិធីជំនួយ Lend-Lease (ឱ្យខ្ចី-ឱ្យជួល) កាលពីសម័យសង្គ្រាមលោកលើកទី ២ រស់ឡើងវិញ ក្នុងនោះ វានឹងអនុញ្ញាតឱ្យ អាម៉េរិក ឱ្យខ្ចី ឬផ្ដល់ជំនួយសព្វាវុធ ដល់បណ្ដាប្រទេសជាសម្ព័ន្ធមិត្ត ដោយប្រើពេលអនុម័តខ្លីបំផុត។
ក្រៅពី អ៊ុយក្រែន បណ្ដាប្រទេសដែលរងផលប៉ះពាល់ពីយុទ្ធនាការយោធារបស់ រុស្ស៊ី ដូចជា ប៉ូឡូញ និងបណ្ដាប្រទេសនៅ អឺរ៉ុបខាងកើត ក៏ទទួលបានផលប្រយោជន៍ពីកម្មវិធីនេះផងដែរ។
