ព្រះមហេសី Azizah មានបន្ទូលថា ទ្រង់ធ្លាប់បានឆ្លងកាត់ការបង្កកំណើតក្នុងមន្ទីរពិសោធន៍ (IVF (In Vitro Fertilization) ចំនួន ១៦ លើក មុនពេលទ្រង់គភ៌លើកដំបូង ដែលនេះគឺជារឿងរ៉ាវពិសេសមួយ ជួយលើកទឹកចិត្តដល់អ្នកដែលមិនមានសមត្ថភាពបន្តពូជ។
«ខ្ញុំធ្លាប់បានឆ្លងកាត់ការបង្កកំណើតក្នុងកែវពិសោធន៍ចំនួន ១៦ លើក និងបានជោគជ័យនៅក្នុងលើកទី ១។ ខ្ញុំនឹកស្មានមិនដល់ថា អាចផ្ដល់កំណើតឱ្យកូនចំនួន ៥ នាក់បន្ថែមទៀត ក្នុងនោះមានទាំងកូនភ្លោះទៀតផង» ព្រះមហាសី Azizah ព្រះជន្ម ៦១ វស្សា មានបន្ទូលប្រាប់ Telegraph កាលពីចុងសប្ដាហ៍កន្លងដូច្នេះ។
មហេសី Azizah បានរៀបអភិសេកជាមួយ មហាក្សត្រ Abdullah កាលពីឆ្នាំ ១៩៨៦ និងទ្រង់គភ៌បុត្រដំបូងកាលពីឆ្នាំ ១៩៩៥។ ក្រោយមក ទ្រង់ក៏បានប្រសូត្របុត្រា ៣ អង្គ និងបុត្រី ២ អង្គថែមទៀត។
ព្រះមហេសី Azizah កាលពីឆ្នាំ ២០០៤ បានបង្កើតមូលនិធិផ្ដល់កំណើត Tunku Azizah ដើម្បីជួយដល់សកម្មភាពនៃវិធីសាស្ត្រព្យាបាលបញ្ហាអសមត្ថភាពបន្តពូជ ពិសេសគឺគូស្វាមីភរិយាក្រីក្រ។
«ខ្ញុំដឹងថា វិធីសាស្ត្រនេះពិតជាត្រូវចំណាយច្រើន និងយល់ច្បាស់ពីការពិបាកចិត្តដែលគ្រប់គ្នាត្រូវឆ្លងកាត់។ ក្រោយការព្យាបាលម្ដងៗ អ្នកត្រលប់ទៅផ្ទះ ហើយយំ» មហេសី Azizah រៀបរាប់។
ក្សត្រីអង្គនេះ ឱ្យដឹងថា ជនជាតិអាស៊ី តែងតែលាក់បាំងបញ្ហាផ្ទាល់ខ្លួន ប៉ុន្តែ ទ្រង់យល់ថា ដល់ពេលដែលគួរនិយាយដល់បញ្ហាអសមត្ថភាពបន្តពូជ ការបង្កកំណើតក្នុងកែវពិសោធន៍ ហើយចាប់ផ្ដើមធ្វើសកម្មភាព។
បុត្រា បុត្រីរបស់មហាក្សត្រ នៃ ប្រទេសម៉ាឡេស៊ី សុទ្ធតែសិក្សានៅសាកលវិទ្យាល័យល្បីៗនៅ ចក្រភពអង់គ្លេស។ ព្រះអង្គម្ចាស់ Abdullah ឡើងគ្រងរាជ្យសម្បត្តិកាលពីឆ្នាំ ២០១៩ និងបន្តសោយរាជ្យរហូតដល់ឆ្នាំ ២០២៤។
