រដ្ឋមន្ត្រីក្រសួងយុត្តិធម៌ Garland ថ្លែងថា នឹងគាំទ្រកិច្ចប្រឹងប្រែងក្នុងការផ្ទេរទ្រព្យសម្បត្តិទាំងឡាយដែល អាម៉េរិក បានរឹបអូសពីក្រុមអ្នកមានរបស់ រុស្ស៊ី «ទៅឱ្យ អ៊ុយក្រែន ដោយផ្ទាល់»។
«រដ្ឋាភិបាល ក៏ដូចជាយើងខ្ញុំ នឹងគាំទ្រច្បាប់ដែលអនុញ្ញាតឱ្យនាំយកប្រាក់មួយចំនួននោះ ទៅឱ្យ អ៊ុយក្រែន ដោយផ្ទាល់។ ប៉ុន្តែ បច្ចុប្បន្ន មិនទាន់មានការសម្រេចបែបនេះនៅឡើយ ចំពោះទ្រព្យទាំងនោះ» រដ្ឋមន្ត្រីក្រសួងយុត្តិធម៌អាម៉េរិក Merrick Garland ឆ្លើយនៅចំពោះមុខសភាជាន់ខ្ពស់ កាលពីថ្ងៃទី ២៦ មេសា នៅពេលត្រូវបានសួរអំពីវិធីចាត់ចែងទៅលើទ្រព្យសម្បត្តិដែលរឹបអូសបានពី រុស្ស៊ី ទាក់ទិននឹងសង្គ្រាមនៅ អ៊ុយក្រែន។
ក្រសួងយុត្តិធម៌អាម៉េរិក កាលពីខែកន្លង បានបង្កើតអង្គភាពពិសេស KleptoCaputer ដែលមានភារកិច្ចអនុវត្តបទបញ្ជារបស់រដ្ឋាភិបាល សំដៅលើ រុស្ស៊ី។ អង្គភាពនេះរួមមាន រដ្ឋអាជ្ញា, កម្លាំងពិសេស និងក្រុមមន្ត្រីជំនាញមកពីអង្គភាពប៉ូលិស រួមនឹងក្រុមត្រួតពិនិត្យអាម៉េរិក។
ករណីរឹបអូសទ្រព្យរបស់ រុស្ស៊ី ដំបូងរបស់ពួកគេគឺ នាវាទេសចរណ៍តម្លៃ ៩០ លានដុល្លារ របស់ មហាសេដ្ឋីរុស្ស៊ី។ នាវានេះត្រូវបានកម្លាំងរបស់ អេស្ប៉ាញ រឹបអូសទៅតាមសំណើរបស់ ទីក្រុងវ៉ាស៊ីងតោន។
នាយករដ្ឋមន្ត្រីអ៊ុយក្រែន Denis Shmygal កាលពីថ្ងៃទី ២៤ មេសា ប្រកាសថា កំពុងពិភាក្សាជាមួយ អាម៉េរិក ទាក់ទងនឹងការប្រើប្រាស់ទ្រព្យដែលត្រូវបានបង្កករបស់ រុស្ស៊ី ដើម្បីផ្ដល់ជាជំនួយដល់ ទីក្រុងកៀវ។ លោក Shmygal ថា អ៊ុយក្រែន ត្រូវការប្រាក់រហូតដល់ ៥ ពាន់លានដុល្លារ/ខែ។ លោកបញ្ជាក់ថា មូលនិធិរូបិយវត្ថុអន្តរជាតិ (IMF) និង ធនាគារពិភពលោក (WB) ក៏បានឯកភាពទៅលើតួលេខនេះ។