ប្រធានាធិបតីរុស្ស៊ី ពូទីន បានប្រាប់ មេដឹកនាំអង្គការសហប្រជាជាតិ អង់តូនីញូ ហ្គុយតេរេស (Antonio Guterres) ថា លោកនៅតែមានសង្ឃឹមទាក់ទិននឹងកិច្ចចរចាបញ្ចប់សង្គ្រាមនៅ អ៊ុយក្រែន។
«បើទោះជាជាក់ស្ដែង សកម្មភាពយោធាកំពុងកើតឡើង ប៉ុន្តែ យើងនៅតែសង្ឃឹមថា អាចសម្រេចបានកិច្ចព្រមព្រៀងតាមរយៈការទូត» លោក ពូទីន ថ្លែងដូច្នេះនៅពេលជួបពិភាក្សាជាមួយមេដឹកនាំអង្គការសហប្រជាជាតិ នៅ មូស្គូ កាលពីម្សិលមិញ។ លោក ពូទីន បន្ថែមថា យើងនៅតែធ្វើការចរចា មិនមែនបដិសេធវាទេ»។
ប្រធានាធិបតីរុស្ស៊ី បានអះអាងប្រាប់លោក អង់តូនីញូ ហ្គុយតេរេស ថា លោក «ដឹងច្បាស់អំពីការព្រួយបារម្ភចំពោះសកម្មភាពយោធារបស់ រុស្ស៊ី» នៅ អ៊ុយក្រែន និងត្រៀមជានិច្ចសម្រាប់ការចរចា ប៉ុន្តែ លោកសង្កត់ធ្ងន់ថា ស្ថានការណ៍ច្របូកច្របល់នៅប្រទេសជិតខាងមួយនេះ កើតឡើងពី «រដ្ឋប្រហារប្រឆាំងរដ្ឋាភិបាល» កាលពីឆ្នាំ ២០១។
អគ្គលេខាធិការអង្គការសហប្រជាជាតិ លោក អង់តូនីញូ ហ្គុយតេរេស ក៏បានរំលឹកឡើងវិញនូវការអំពាវនាវក្នុងកិច្ចពិភាក្សាជាមួយរដ្ឋមន្ត្រីការបរទេសរុស្ស៊ី Sergey Lavrov ថា មូស្គូ និង កៀវ គួរតែសហការជាមួយ អង្គការសហប្រជាជាតិ ដើម្បីបង្កើតច្រកសម្រាប់ជំនួយផ្នែកមនុស្សធម៌ និងជម្លៀសប្រជាជនស៊ីវិល។
Stephane Dujarric អ្នកនាំពាក្យរបស់ អគ្គលេខាធិការអង្គការសហប្រជាជាតិ និយាយថា លោក ពូទីន ឯកភាពលើ គោលការណ៍ ជាមួយ អង្គការសហប្រជាជាតិ និង គណៈកម្មការកាកបាទក្រហមអន្តរជាតិ ស្ដីពីការចូលរួមជ្លៀសប្រជាជនស៊ីវិល ចេញពីរោងចក្រដែកថែប Azovstal នៅទីក្រុង Mariupol។
លោក Dujarric បន្ថែមថា កិច្ចចរចាបន្ទាប់នឹងធ្វើឡើងរវាង ការិយាល័យមនុស្សធម៌ របស់ អង្គការសហប្រជាជាតិ និង ក្រសួងការពារជាតិរបស់ រុស្ស៊ី។
នេះគឺជាទស្សនកិច្ចដំបូងរបស់លោក អង់តូនីញូ ហ្គុយតេរេស ទៅកាន់ មូស្គូ រាប់ចាប់តាំងពី រុស្ស៊ី បានបើកការឈ្លានពានលើ អ៊ុយក្រែន កាលពីថ្ងៃទី ២៤ កុម្ភៈ។ តាមគម្រោង អគ្គលេខាធិការអង្គការសហប្រជាជាតិ នឹងទៅកាន់ រដ្ឋធានីកៀវ បន្ទាប់ពីបានបញ្ចប់ទស្សនកិច្ចនៅ រុស្ស៊ី៕
