សហភាពអឺរ៉ុប (EU) មិនមានសំឡេងគាំទ្រគ្រប់គ្រាន់ពីបណ្ដាប្រទេសជាសមាជិក ដើម្បីអាចដាក់បម្រាមទាំងស្រុង ឬដាក់ទណ្ឌកម្មដោយយកពន្ធខ្ពស់ទៅលើប្រេង និងឧស្ម័នដែលនាំចូលពី ប្រទេសរុស្ស៊ី។
«បច្ចុប្បន្ន EU មិនសម្រេចបានសំឡេងឯកភាពទៅលើបញ្ហានេះ» តំណាងជាន់ខ្ពស់ផ្នែកគោលនយោបាយការបរទេស និងសន្តិសុខរបស់ EU លោក Josep Borrell បានប្រាប់សារព័ត៌មាន Die Welt របស់ អាល្លឺម៉ង់ នាថ្ងៃនេះដូច្នេះ ។
ការនាំចេញប្រេងគឺជាប្រភពចំណូលពីបរទេសចម្បងរបស់ រុស្ស៊ី ហើយសមាជិកជាច្រើនរបស់ EU បានអំពាវនាវឱ្យបញ្ឈប់ការនាំចូលប្រេងពី រុស្ស៊ី ដើម្បីប្រឆាំងនឹងសង្គ្រាមនៅ អ៊ុយក្រែន។
ប្រទេសមួយចំនួនរបស់ EU កំពុងជំរុញការដាក់ទណ្ឌកម្មទី ៦ ចំពោះ រុស្ស៊ី ក្នុងនោះ ទីក្រុងព្រុចសែល (បែលហ្ស៊ិក) កំពុងត្រៀមសម្រាប់ការវាយតម្លៃពេញលេញអំពីផលប៉ះពាល់នៃបទបញ្ជាហាមនាំចូលប្រេងពី រុស្ស៊ី ដោយចាត់ទុកដូចទៅនឹងវិធានការដាក់ទណ្ឌកម្មថ្មី។
លោក Borrell ឱ្យដឹងថា ប្រធានបទស្ដីពីការហាមឃាត់ប្រេង និងឧស្ម័នរុស្ស៊ី នឹងត្រូវបានលើកយកមកពិភាក្សាជាថ្មីនៅក្នុងកិច្ចប្រជុំកំពូល EU ដែលនឹងត្រូវធ្វើឡើងនៅចុងខែនេះ។
