រដ្ឋមន្ត្រីការបរទេសអាម៉េរិក យល់ថា រុស្ស៊ី មិនសម្រេចបានគោលដៅក្នុងយុទ្ធនាការយោធានៅ អ៊ុយក្រែន ទន្ទឹមនឹងនេះក៏បានប្រកាសកញ្ចប់ជំនួយផ្នែកយោធាថ្មីដល់ ទីក្រុងកៀវ។
រដ្ឋមន្ត្រីការបរទេសអាម៉េរិក លោក អង់តូនី ប្លីនខេន (Antony Blinken) ឱ្យដឹងថា លោក និងរដ្ឋមន្ត្រីការពារជាតិ ឡយ អូស្ទីន (Lloyd Austin) បានពិភាក្សាគ្នារយៈពេល ៣ ម៉ោង ជាមួយ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី រួមជាមួយនឹងក្រុមទីប្រឹក្សាជាន់ខ្ពស់របស់លោក នៅ រដ្ឋធានីកៀវ ក្នុងដំណើរទស្សនកិច្ចសម្ងាត់មួយកាលពីថ្ងៃទី ២៤ មេសា។
នេះគឺជាដំណើរទស្សនកិច្ចរបស់ក្រុមមន្ត្រីជាន់ខ្ពស់បំផុតរបស់ សហរដ្ឋអាម៉េរិក ទៅកាន់ អ៊ុយក្រែន រាប់ចាប់តាំងពី រុស្ស៊ី បានចូលឈ្លានពាន អ៊ុយក្រែន។
«រុស្ស៊ី ស្វែងរកវិធីសម្រេចគោលដៅដកហូតឯករាជ្យ បូរណភាពទឹកដី របស់ អ៊ុយក្រែន ដោយប្រើប្រាស់កម្លាំងយោធា សេដ្ឋកិច្ច ទៅលើ អ៊ុយក្រែន ប៉ុន្តែ ពួកគេបានបរាជ័យ» លោក Blinken ថ្លែងនៅក្នុងសន្និសីទសារព័ត៌មានមួយនៅទីតាំងសម្ងាត់ក្នុងតំបន់ព្រំដែនរវាង ប៉ូឡូញ-អ៊ុយក្រែន ក្រោយពីបានចាកចេញពី រដ្ឋធានីកៀវ។
ភាគីខាង រុស្ស៊ី មិនទាន់មានការអធិប្បាយអ្វីទាក់ទងនឹងប្រកាសរបស់រដ្ឋមន្ត្រីការបរទេសអាម៉េរិក នៅឡើយ។ កន្លងមក ក្រសួងការពារជាតិរុស្ស៊ី ធ្លាប់បានឱ្យដឹងថា គោលដៅនៃយុទ្ធនាការយោធានៅ អ៊ុយក្រែន គឺដើម្បី «បំបាត់ហ្វាស៊ីសនិយម បំបាត់ការធ្វើយោធូបនីយកម្ម» របស់អាជ្ញាធរអ៊ុយក្រែន ក៏ដូចជាការពារពលរដ្ឋនិយាយភាសារុស្ស៊ី នៅក្នុងតំបន់ Donbass ប៉ុន្តែមិនស្វែងរកវិធីផ្លាស់ប្ដូររបបនៅប្រទេសនេះ។
ក្នុងដំណើរទស្សនកិច្ចនេះ លោក អូស្ទីន និងលោក ប្លីនខេន ក៏បានប្រកាសអំពីកញ្ចប់ជំនួយយោធាថ្មី តម្លៃ ៧១៣ លានដុល្លារ ដល់ អ៊ុយក្រែន រួមនឹងប្រទេសជាសម្ព័ន្ធមិត្ត និងដៃគូសហការ ១៥ ផ្សេងទៀត ក្នុងនោះ ទីក្រុងកៀវ ទទួលបានប្រហែល ៣២២ លានដុល្លារអាម៉េរិក។
