ក្រុមមន្ត្រីចិន កំពុងរៀបចំផែនបាញ់បង្ហោះយានទៅបុកអាចម៍ផ្កាយ ដើម្បីផ្លាស់ប្ដូរគន្លងគោចររបស់វានៅក្នុងប៉ុន្មានឆ្នាំខាងមុខ។
Wu Yanhua អនុប្រធាននៃ ទីភ្នាក់ងារអវកាសចិន ឱ្យដឹងថា ប្រទេសចិន បានចាប់ផ្ដើមគម្រោងកសាងប្រព័ន្ធប្រឆាំងអាចម៍ផ្កាយដែលអាចបង្កគ្រោះថ្នាក់ដល់ផែនដី។ ពួកគេកំណត់គោលដៅតាមដានអាចម៍ផ្កាយដែលអាចបង្កហានិភ័យដល់ផែនដី រួចបញ្ជាឱ្យយានហោះទៅបុកដុំអាចម៍ផ្កាយនោះដើម្បីបង្វែរគន្លងគោចររបស់វា នៅឆ្នាំ ២០២៥-២០២៦ ដែលជាជំហានបន្ទាប់នៅក្នុងកម្មវិធីអវកាសរបស់ ប្រទេសចិន។ នេះបើយោងតាមការឱ្យដឹងពីទីភ្នាក់ងារអវកាសចិន (CNSA)។
ក្រៅពីនេះ ប្រទេសចិន ក៏នឹងចាប់ផ្ដើមដំណាក់កាលទី ៤ នៃកម្មវិធីស្រាវជ្រាវលើឋានព្រះចន្ទ នៅក្នុងឆ្នាំ ២០២២ នេះផងដែរ ដែលក្នុងនោះរួមមាន ការបាញ់បង្ហោះយានស្រាវជ្រាវ Chang’e ៦, ៧ និង ៨ ទៅកាន់ឋានព្រះចន្ទ និងសាងសង់ស្ថានីយស្រាវជ្រាវព្រះចន្ទអន្តរជាតិ។
កម្មវិធីស្រាវជ្រាវព្រះចន្ទ ថ្មីបំផុត របស់ ចិន ត្រូវបានអនុម័តកាលពីចុងឆ្នាំ ២០២១ និងចែកចេញជា ៣ ដំណាក់កាល។ បេសកកម្មរបស់ Chang’e ៦, ៧ និង ៨ នឹងចាប់ផ្ដើមហោះហើរឱ្យបានមុនឆ្នាំ ២០៣។ Wu បានឱ្យដឹងថា គោលដៅចម្បងគឺស្រាវជ្រាវប៉ូលខាងត្បូងរបស់ព្រះចន្ទ ដើម្បីសាងសង់ហេដ្ឋារចនាសម្ព័ន្ធមូលដ្ឋានសម្រាប់ស្ថានីយស្រាវជ្រាវ។
បេសកកម្ម Chang’e ៦ នឹងរកវិធីប្រមូលសំណាកដីពី ១ ទៅ ២ គីឡូក្រាម ពីប៉ូលខាងត្បូងរបស់ព្រះចន្ទ និងនាំយកមកកាន់ផែនដី។ មុននោះ បេសកកម្ម Chang’e ៤ បាននាំយកសំណាកដីព្រះចន្ទ ១.៧៣ គីឡូក្រាម មកកាន់ផែនដីរួចហើយកាលពីឆ្នាំ ២០២០។
បេសកកម្ម Chang’e ៧ នឹងចុះចតលើប៉ូលខាងត្បូងរបស់ព្រះចន្ទ ដើម្បីស្រាវជ្រាវ និងស្វែងរកដានទឹកកក។ ដំណាក់កាលចុងក្រោយគឺ បេសកកម្ម Chang’e ៨ ដែលត្រូវធ្វើការទាញយកធនធាននៅលើឋានព្រះចន្ទ និងបង្កើតស្ថានីយស្រាវជ្រាវនៅទីនោះ។ តាមគម្រោង យានសម្រាប់បេសកកម្ម Chang’e ៦ និង ៧ នឹងត្រូវបានបាញ់បង្ហោះនៅឆ្នាំ ២០២៥៕