ក្រុមអ្នកអវកាសមួយក្រុម បញ្ចប់បេសកកម្មរយៈពេល ១២ ថ្ងៃ នៅលើស្ថានីយអវកាសអន្តរជាតិ (ISS) ដោយការហោះហើរត្រលប់មកកាន់ផែនដី ជាមួយនឹងយាន Crew Dragon របស់ SpaceX ដែលគ្រោងនឹងចុះចតដោយឆត្រយោងនៅលើសមុទ្រ។
បេសកកម្ម AX-១ ដែលគ្រប់គ្រងដោយក្រុមហ៊ុនធុរកិច្ចថ្មី Axiom Space នៅ Houston រដ្ឋ Texas ផ្ដល់សេវាកម្មហោះហើរដោយប្រើប្រាស់រ៉ុក្កែត ការហ្វឹកហាត់ និងការចាត់ចែងជើងហោះហើរទៅកាន់ ISS សម្រាប់អតិថិជនបង់ប្រាក់។
សមាជិកក្រុមហោះហើរខាងលើមានគ្នា ៤ នាក់ រួមមាន មេបញ្ជាការ Michael Lopez-Alegria អតីតអវកាសយានិករបស់ ណាសា, អ្នកជំនួញជនជាតិអ៊ីស្រាអែល Eytan Stichael, អ្នកវិនិយោគជនជាតិកាណាដា Mark Pathy និងអ្នកវិនិយោគអចលនទ្រព្យអាម៉េរិក Larry Connor មកពី Ohio។ ពួកគេបានចាកចេញពី ISS ដោយជិះក្នុងយាន Crew Dragon របស់ SpaceX កាលពីម៉ោង ១០ ព្រឹក ថ្ងៃទី ២០ មេសា ២០២២ (ម៉ោងនៅ កម្ពុជា)។
ក្រុមអ្នកអវកាសនេះនឹងត្រូវឆ្លងកាត់ច្រើនម៉ោងនៅក្នុងយានទំហំ ៤ ម៉ែត្រក្រឡា នៅពេល Crew Dragon បានហោះចុះដល់តំបន់បរិយាកាសក្រាស់របស់ផែនដី។ ពួកគេនឹងចុះចតដោយប្រើឆត្រយោងនៅលើផ្ទៃសមុទ្រ បើសិនអាកាសធាតុអំណោយផល។ នេះបើតាមការឱ្យដឹងពីទីភ្នាក់ងារអវកាសអាម៉េរិក ណាសា។
Lopez-Alegria និងសមាជិកក្រុមហោះហើរផ្សេងទៀត បានហោះឡើងដល់ ISS ប្រហែល ១ សប្ដាហ៍កន្លង និងបានជួបជុំក្រុមអ្នកអវកាសដែលកំពុងធ្វើការនៅទីនោះ ដែលរួមមាន ជនជាតិអាម៉េរិក ៣ នាក់, អាល្លឺម៉ង់ ១ នាក់ និង រុស្ស៊ី ៣ នាក់។
AX-១ គឺជាបេសកកម្មដំបូងដែលមានក្រុមហោះហើរជាជនស៊ីវិល និងមិនមានសមាជិកណាមួយមកពីស្ថាប័នរដ្ឋ។ នេះក៏ជាលើកដំបូងផងដែរ ដែលក្រុមជនស៊ីវិល ហោះទៅដល់ ISS ដោយប្រើយានអវកាសដែលផលិតនៅ សហរដ្ឋអាម៉េរិក។ ក្នុងបេសកកម្មនេះ ពួកគេបានធ្វើការពិសោធផ្នែកវិទ្យាសាស្ត្រមួយចំនួនដែលត្រូវបានបង្កើតឡើងដោយមន្ទីរពេទ្យ សាកលវិទ្យាល័យ និងក្រុមហ៊ុនបច្ចេកវិទ្យាជាច្រើន។ ពួកគេក៏ចំណាយពេលហៅទូរស័ព្ទទៅកាន់ក្មេងៗ និងនិស្សិតនៅលើដីផងដែរ។
ការចំណាយទៅលើបេសកកម្ម AX-១ នេះ បច្ចុប្បន្នមិនទាន់ត្រូវបានបង្ហើបឱ្យដឹងនៅឡើយ៕