ក្រសួងការពារជាតិរុស្ស៊ី បញ្ជាក់ថា បានចាប់ផ្ដើមដំណាក់កាលទីពីរ នៃយុទ្ធនាការយោធា និងធ្វើការវាយប្រហារទៅលើទីតាំងនានានៅពាសពេញទឹកដីភាគខាងកើតរបស់ អ៊ុយក្រែន។
ថ្ងៃទី ២០ មេសា ២០២២ ក្រសួងការពារជាតិរុស្ស៊ី បាននិយាយថា មីស៊ីលការពារដែនអាកាសដែលបាញ់ចាំគោលដៅកម្រិតខ្ពស់ បានកម្ទេច ១៣ គោលដៅរបស់ អ៊ុយក្រែន នៅតំបន់ Donbass ក្នុងគ្រាដែលការវាយប្រហារតាមអាកាសផ្សេងទៀត បានបំផ្លាញឧបករណ៍យោធា ៦០ គោលដៅ ក្នុងនោះមាននៅក្នុងបណ្ដាទីរួមស្រុកជាប់នឹងសមរភូមិភាគខាងកើត។
សរុប មានគោលដៅយោធាចំនួន ១,២៦០ ដែលស្ថិតនៅតាមបណ្ដោយសមរភូមិមុខប្រវែងជាង ៤៨០ គីឡូម៉ែត្រ ត្រូវបានវាយប្រហារដោយកាំភ្លើងធំ និងមីស៊ីលរបស់ រុស្ស៊ី នៅក្នុងដំណាក់កាលទីពីរនៃសង្គ្រាមនេះ។
ភាគីខាងអ៊ុយក្រែន ក៏បានបញ្ជាក់ថា មានការប្រយុទ្ធគ្នាយ៉ាងខ្លាំងក្លានៅតាមបណ្ដោយសមរភូមិមុខដែលមានប្រវែងរាប់រយគីឡូម៉ែត្រនៅភាគខាងកើតប្រទេស។ ការប្រយុទ្ធនេះបានកើតឡើងតែប៉ុន្មានម៉ោងប៉ុណ្ណោះ ក្រោយប្រធានាធិបតីអ៊ុយក្រែន លោក ហ្សេឡែនស្គី ប្រកាសថា រុស្ស៊ី បានចាប់ផ្ដើមបើកការវាយប្រហារធំនៅ Donbass ដែលជាមជ្ឈមណ្ឌលឧស្សាហកម្មរបស់ អ៊ុយក្រែន។
