តុលាការសហព័ន្ធ បានចេញសេចក្ដីសម្រេចថ្មី ដែលបង្គាប់ឱ្យរដ្ឋាភិបាលអាម៉េរិក ដកវិធានការទាំងស្រុង ដែលកំពុងបង្ខំឱ្យប្រជាជនពាក់ម៉ាសនៅលើមធ្យោបាយធ្វើដំណើរសាធារណៈ។
រដ្ឋាភិបាលរបស់លោក ចូ បៃដិន នឹងមិនបន្តអនុវត្តវិធានការបង្ខំឱ្យពាក់ម៉ាសនៅលើមធ្យោបាយធ្វើដំណើរសាធារណៈទៀតឡើយ បន្ទាប់ពីតុលាការសហព័ន្ធនៅ Florida កាលពីថ្ងៃចន្ទ បានធ្វើការសម្រេចថា ការកំណត់ឱ្យពាក់ម៉ាសដោយបង្ខំក្នុងរយៈពេល ១៤ ខែមកនេះ គឺជារឿងខុសច្បាប់ ដូច្នេះ តុលាការបានប្រែក្រឡាស់កិច្ចខិតខំរបស់ សេតវិមាន ក្នុងការកាត់បន្ថយការឆ្លងកូវីដ-១។ នេះបើតាមប្រភពព័ត៌មានពី Reuters ដែលបានចុះផ្សាយនាពេលថ្មីៗនេះ។
ការសម្រេចថ្មីបំផុតនេះត្រូវបានធ្វើឡើងដោយចៅក្រម Kathryn Kimball Mizelle ជាមន្ត្រីតុលាការដែលត្រូវបានតែងតាំងដោយប្រធានាធិបតី Donald Trump បន្ទាប់ពីមានពាក្យស្នើឱ្យមានបណ្ដឹងកាលពីឆ្នាំមុន របស់ស្ថាប័នមួយ។
ចៅក្រម Mizelle និយាយថា មជ្ឈមណ្ឌលគ្រប់គ្រង និងទប់ស្កាត់ជំងឺឆ្លងអាម៉េរិក (CDC) បានប្រើប្រាស់អំណាចលើសដែនកំណត់ក្នុងការអនុវត្តបទបញ្ជា។
មន្ត្រីរដ្ឋាភិបាលអាម៉េរិក ១ រូប បានឱ្យដឹងថា CDC មានសិទ្ធិក្នុងការប្ដឹងជំទាស់ ឬស្នើឱ្យមានការពន្យារពេលជាបន្ទាន់នូវការអនុវត្តការកំណត់នេះ។
បន្ទាប់ពីសេចក្ដីសម្រេចថ្មីត្រូវបានប្រកាសភ្លាម ក្រុមហ៊ុនអាកាសចរណ៍ចំនួន ២ គឺ United Airlines និង Alaska Airlines ក៏បានប្រញាប់បន្ធូរបន្ថយវិធានការទប់ស្កាត់បច្ចុប្បន្នដែលកំពុងត្រូវបានអនុវត្តទៅលើជើងហោះហើរក្នុងស្រុក។
បច្ចុប្បន្ន សហរដ្ឋអាម៉េរិក មានអ្នកឆ្លងកូវីដ-១៩ ប្រមាណ ៣៦,០០០ នាក់ និងស្លាប់ជាមធ្យម ៦០ នាក់ ជារៀងរាល់ថ្ងៃ។ នេះបើគិតទៅលើតួលេខមធ្យមភាគនៃករណីឆ្លង និងស្លាប់ដោយសារកូវីដ-១៩ ក្នុងអំឡុង ៧ ថ្ងៃចុងក្រោយនេះ។
ចំណែកភាគី សេតវិមាន វិញ បានហៅសេចក្ដីសម្រេចថ្មីរបស់តុលាការខាងលើថា ជាបទបញ្ជាគួរឱ្យអស់សង្ឃឹមបំផុត៕