ការដែល ទីភ្នាក់ងារអវកាសអាម៉េរិក ណាសា (NASA) ព្យាយាមរកវិធីដើម្បីទាក់ទងទៅកាន់មនុស្សពិភពដទៃ អាចបង្កជាហានិភ័យធំ គ្រោះថ្នាក់ដល់មនុស្សនៅលើផែនដី ដោយសារពួក អេលៀន អាចចូលមកដណ្ដើមយកផែនដីទៅគ្រប់គ្រង ជំនួសមនុស្ស។
យោងតាម RT គម្រោងបញ្ជូនទិន្នន័យស្ដីពីទីតាំង និងព័ត៌មានដទៃរបស់មនុស្ស ចូលទៅកាន់ទីអវកាស របស់ ណាសា ដែលហៅថា «Beacon in the Galaxy» (BITG ឬ ភ្លើងសញ្ញាក្នុងកាឡាក់ស៊ី) គឺជាគម្រោងរបស់ក្រុមអ្នកស្រាវជ្រាវដែលដឹកនាំដោយ អង្គការណាសា ដើម្បីជាស្វាគមន៍ចំពោះអរិយធម៌ឆ្លាតវៃនៅខាងក្រៅផែនដី។
ណាសា មានបំណងផ្សាយរលកសញ្ញាខាងលើពីបណ្ដាញតេឡេស្កុបវិទ្យុ Allen របស់វិទ្យាស្ថាន SETI នៅ California និង តេឡេស្កុបវិទ្យុ FAST ដែលមានអង្កត់ផ្ចិត ៥០០ ម៉ែត្រ របស់ ប្រទេសចិន។ ទិន្នន័យដែលនឹងរួមមានទាំង សមាសធាតុជីវគីមីរបស់ជីវិតនៅលើផែនដី, ទីតាំងដែលត្រូវបានដាក់សញ្ញាទៅតាមពេលវេលារបស់ប្រព័ន្ធព្រះអាទិត្យនៅក្នុងកាឡាក់ស៊ី មីលគីវ៉េ, រូបភាពឌីជីថលស្ដីពីមនុស្ស និងពាក្យអញ្ជើញឱ្យមនុស្សក្រៅភពផែនដី ឆ្លើយតប។
លោក Anders Sanberg អ្នកវិទ្យាសាស្ត្រជាន់ខ្ពស់ ១ រូប នៅវិទ្យាស្ថានអនាគតមនុស្សជាតិ ប្រចាំសាកលវិទ្យាល័យ Oxford (FHI) យល់ថា កម្មវិធីដូចខាងលើ អាចជួបនឹងហានិភ័យ។ ក្នុងករណីមនុស្សក្រៅភពផែនដី ទទួលបានសារ ប្រតិកម្មអាចមិនមានត្រឹមតែពាក្យសួស្ដីប្រកបដោយភាពកក់ក្ដៅនោះឡើយ។
ចំណែកអ្នកវិទ្យាសាស្ត្រ Toby Ord មកពី FHI ប្រចាំ Oxford ក៏បាននិយាយថា គម្រោងខាងលើគួរតែយកមកពិភាក្សាជាសាធារណៈ។ ការស្ដាប់សារដែលផ្ញើពីទីអវកាសក៏អាចធ្វើឱ្យមនុស្សមានគ្រោះថ្នាក់ ព្រោះវាអាចជាអន្ទាក់។ លោកថា «ហានិភ័យនៃគ្រោះថ្នាក់នេះ ថ្វីបើមានកម្រិតទាប ប៉ុន្តែមិនទាន់ត្រូវបានយល់ច្បាស់ និងមិនទាន់មានការគ្រប់គ្រងបានល្អនៅឡើយ»។
លោក Ord បន្តថា «ដោយសារតែផ្នែកអវិជ្ជមានអាចធំជាងឆ្ងាយធៀបនឹងផ្នែកវិជ្ជមាន ដូច្នេះវាមិនមែនជាកាលៈទេសៈល្អ ដើម្បីធ្វើការទាក់ទងជាមួយមនុស្សពិភពក្រៅផែនដី»។
កន្លងមក ក្រុមអ្នកវិទ្យាសាស្ត្រធ្លាប់បានប្រើប្រាស់បច្ចេកវិទ្យាដំបូងៗ ដើម្បីផ្ញើជាសារទៅកាន់ទីអវកាស ដូចជា សារ Arecibo កាលពីឆ្នាំ ១៩៧៤ និងសារផ្សេងទៀតកាលពីឆ្នាំ ១៩៩៩ និង ២០០៣ ជាដើម។ លោក Sandberg យល់ថា មនុស្សក្រៅភពផែនដី អាចទទួលបានសារទាំងនោះរួចហើយ ដោយមូលហេតុច្រើនយ៉ាង។
អ្នកវិទ្យាសាស្ត្រទាំងឡាយដែលស្ថិតក្នុងក្រុម BITG យល់ថា មនុស្សក្រៅភពផែនដីដែលមានអរិយធម៌ជឿនលឿន និងអាចធ្វើការទាក់ទងគ្នានៅក្នុងទីអវកាស ទំនងជាមានកម្រិតទំនាក់ទំនងខ្ពស់រវាងពួកគេ ដូច្នេះពួកគេប្រាកដជាបានដឹងអំពីសារសំខាន់របស់សន្តិភាព និងកិច្ចសហការ។
ក៏ប៉ុន្តែ អ្នកវិទ្យាសាស្ត្រជនជាតិកាណាដា លោក George Dvorsky បានយល់ឃើញផ្ទុយពីនេះ។ លោកថា លោកអាចគិតឃើញសេណារីយោជាច្រើន ក្នុងនោះមានទាំងសេណារីយោដែលថា ក្រុមមនុស្សក្រៅភពផែនដី ដែលមាននិន្នាការអាក្រក់ នៅតែបន្តបង្ហាញវត្តមាន៕