ទីក្រុងប៉េកាំង បានបញ្ចេញសញ្ញាបង្ហាញថា ស្ថានីយអវកាស Tiangong ត្រៀមខ្លួនទទួលអ្នកស្រាវជ្រាវរបស់បណ្ដាប្រទេសក្នុងពិភពលោក។
ប្រទេសចិន បានអញ្ជើញអ្នកអវកាសបរទេស ចូលរួមបេសកកម្ម និងធ្វើការស្រាវជ្រាវនៅឯស្ថានីយអវកាស Tiangong របស់ប្រទេសនេះ។ កាលពីថ្ងៃទី ១៨ មេសា អ្នកនាំពាក្យរបស់ ក្រសួងការបរទេសចិន Wang Wenbin បានឱ្យដឹងថា ទីក្រុងប៉េកាំង ត្រៀមខ្លួនជានិច្ចក្នុងការសហការជាមួយបណ្ដាប្រទេសនៅលើស្ថានីយអវកាសផ្ទាល់ខ្លួន។
លោក Wang បន្ថែមថា ប្រទេសចិន កំពុងប្រឹក្សាយោបល់ជាមួយ អង្គការសហប្រជាជាតិស្ដី ពីបេសកកម្មអវកាសរួមរបស់សហគមន៍អន្តរជាតិ។ យោងតាមមន្ត្រីរូបនេះ អ្នកអវកាសអន្តរជាតិមួយក្រុមអាចចាប់ផ្ដើមធ្វើការរួមគ្នាយ៉ាងឆាប់បំផុត គឺចាប់ពីចុងឆ្នាំ ២០២២។
កាលពីខែមេសា ប្រទេសចិន បាននាំយកទូ ឬបន្ទប់ស្នូល ឬហៅថា ម៉ូឌុល ដំបូងរបស់ស្ថានីយអវកាស Tiangong ឡើងទៅកាន់គន្លងគោចរ។ ចំណែកម៉ូឌុលចំនួន ២ ផ្សេងទៀត កំពុងរង់ចាំការបាញ់បង្ហោះក្នុងឆ្នាំនេះ ដើម្បីបញ្ចប់ដំណាក់កាលដំឡើងស្ថានីយអវកាស។
បើសិនជាគ្រប់យ៉ាងដំណើរការដោយរលូត ស្ថានីយអវកាសរបស់ ចិន នឹងចាប់ផ្ដើមបេសកកម្មក្នុងពេលឆាប់ៗខាងមុខ ហើយអូសបន្លាយពេលជាង ១ ទសវត្សរ៍។ សារព័ត៌មាន SCMP ចេញផ្សាយថា ស្ថានីយអវកាសនេះនឹងក្លាយជាមូលដ្ឋានធំជាងគេបង្អស់ក្នុងពិភពលោក ដែលគោចរក្នុងគន្លងតារាវិថី និងគ្រប់គ្រងដោយប្រទេសតែមួយ។
អ្នកអវកាសចិន ៣ រូប ទើបតែបានវិលត្រលប់ពីម៉ូឌុលស្នូលរបស់ស្ថានីយអវកាស Tiangong មកកាន់ផែនដី កាលពីថ្ងៃទី ១៦ មេសា។ ពួកគេបានស្ថិតនៅក្នុងទីអវកាសចំនួន ១៨៣ ថ្ងៃ ពោលគឺយូរជាងគេបង្អស់ក្នុងពិភពលោក។ ក្នុងរយៈពេល ៦ ខែកន្លង ក្រុមអ្នកអវកាសនេះបានដំឡើងដៃយន្តនៅខាងក្រៅបន្ទប់ស្នូល កែតម្រូវកាណុងកាមេរ៉ា និងធ្វើការពិសោធ សាកល្បងមួយចំនួន។
តាមផែនការ ក្រុមអវកាសចរបន្ទាប់របស់ ចិន នឹងត្រូវហោះទៅកាន់បន្ទប់ស្នូលរបស់ Tiangong នៅក្នុងខែឧសភាខាងមុខ។ ពួកគេនឹងទទួលខុសត្រូវក្នុងការត្រួតពិនិត្យកិច្ចការដំឡើងបន្ទប់ម៉ូឌុលចំនួន ២ ផ្សេងទៀត៕
