កាលពីថ្ងៃទី ១៧ មេសា ប្រទេសភូមា (មីយ៉ានម៉ា) បានបើកដំណើរការអាកាសយានដ្ឋានអន្តរជាតិ Yangon ឡើងវិញ បន្ទាប់ពីបានផ្អាករាល់ការហោះហើរពាណិជ្ជកម្មអស់រយៈពេល ២ ឆ្នាំ ដោយសារតែ កូវីដ-១៩។
មន្ត្រីម្នាក់នៅព្រលានយន្តហោះខាងលើបានឱ្យដឹងថា ជើងហោះហើរមួយរបស់ក្រុមហ៊ុនអាកាសចរណ៍សិង្ហបុរី Singapore Airlines បានចុះចតនៅពេលព្រឹកក្នុងថ្ងៃទី ១៧ មេសា ក្លាយជាជើងហោះហើរដំបូងដែលបានមកដល់អាកាសយានដ្ឋានអន្តរជាតិ Yangon រាប់ចាប់តាំងពីបើកដំណើរការឡើងវិញ នេះបើតាមការចុះផ្សាយរបស់ ទីភ្នាក់ងារសារព័ត៌មានចិន Xinhua។
យោងតាមការកំណត់ស្ដីពីវិធានការទប់ស្កាត់ កូវីដ-១៩ អ្នកដំណើរដែលមកកាន់ មីយ៉ានម៉ា ត្រូវមានលិខិតបញ្ជាក់ថា បានទទួលការចាក់វ៉ាក់សាំងបង្ការជំងឺ កូវីដ-១៩ រួចហើយ អមជាមួយនឹងលទ្ធផលនៃការធ្វើតេស្ត PCR អវិជ្ជមាន។ អ្នកដំណើរបរទេសក៏ត្រូវមានប័ណ្ណបញ្ជាក់អំពីធានារ៉ាប់រងសុខភាពកូវីដ-១៩ ដែលទិញពីក្រុមហ៊ុនធានារ៉ាប់រងមីយ៉ានម៉ា។ ទន្ទឹមនឹងនេះ អ្នកដំណើរទាំងអស់នឹងត្រូវស្នាក់នៅក្នុងសណ្ឋាគារដែលកំណត់ដោយរដ្ឋាភិបាល ដើម្បីរង់ចាំទទួលលទ្ធផលតេស្ត PCR ពីក្រសួងសុខាភិបាលមីយ៉ានម៉ា ក្នុងរយៈពេលប្រហែល ២៤ ម៉ោង។
ប្រទេសភូមា កាលពីថ្ងៃទី ១៦ មេសា បានរកឃើញអ្នកឆ្លងកូវីដ-១៩ ចំនួន ១៨ នាក់ ធ្វើឱ្យចំនួនសរុបនៃករណីវិជ្ជមាននឹងវីរុសនេះឡើងដល់ជាង ៦១២,០០០ នាក់ ខណៈដែលករណីស្លាប់ដោយសារជំងឺនេះគឺមានជាង ១៩,០០០ នាក់។ គិតមកដល់ថ្ងៃទី ៩ មេសា ប្រជាជនជាង ២២.២៣ លាននាក់ ក្នុងចំណោមប្រជាជនសរុបជាង ៥៥ លាននាក់ របស់ ប្រទេសនេះ បានទទួលការចាក់វ៉ាក់សាំងពេញលេញ៕