ប្រភពព័ត៌មានមួយបានឱ្យដឹងថា សហរដ្ឋអាម៉េរិក រួមនឹងក្រុមប្រទេស G៧ និង សហភាពអឺរ៉ុប (EU) នឹងហាមការវិនិយោគថ្មីទៅក្នុង ប្រទេសរុស្ស៊ី ដើម្បីជាការដាក់ទណ្ឌកម្មបន្ថែម បន្ទាប់ពី ទីក្រុងមូស្គូ បានចូលឈ្លានពានទឹកដីរបស់ អ៊ុយក្រែន។
បទបញ្ជាសហការថ្មីទាំងឡាយ រវាង អាម៉េរិក, G៧ (The Group of Seven គឺជាវេទិកានយោបាយអន្តររដ្ឋាភិបាល ដែលមានប្រទេសចំនួន ៧ ជាសមាជិក រួមមាន កាណាដា បារាំង អាល្លឺម៉ង់ អ៊ីតាលី ជប៉ុន ចក្រភពអង់គ្លេស និង សហរដ្ឋអាមេរិក) និង EU ដែលគ្រោងនឹងប្រកាសនៅថ្ងៃនេះ នឹងរួមមានទាំងបទបញ្ជា ហាមឃាត់រាល់ការវិនិយោគថ្មីទៅក្នុង ប្រទេសរុស្ស៊ី, ការបង្កើនការដាក់ទណ្ឌកម្មប្រឆាំងស្ថាប័នហិរញ្ញវត្ថុ និងក្រុមហ៊ុនរបស់ រុស្ស៊ី និងការដាក់ទណ្ឌកម្មលើ មន្ត្រីរដ្ឋាភិបាលរុស្ស៊ី និងសមាជិកគ្រួសាររបស់ពួកគេ។ នេះបើតាមការឱ្យដឹងពីប្រភពព័ត៌មានច្បាស់ការណ៍មួយដែលបានចែករំលែកកាលពីថ្ងៃទី ៥ មេសា។
ប្រភពព័ត៌មានដែលសុំមិនបញ្ចេញឈ្មោះខាងលើបន្ថែមថា ការដាក់ទណ្ឌកម្មថ្មីបំផុត ប្រឆាំងនឹងសេដ្ឋកិច្ចរបស់ រុស្ស៊ី នេះ ត្រូវបានធ្វើឡើងបន្ទាប់ពី ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី បានចោទប្រកាន់លើ កងទ័ពរុស្ស៊ី ថា បានសម្លាប់ជនស៊ីវិលនៅទីរួមស្រុក Bucha ក្នុង ប្រទេសអ៊ុយក្រែន។
