មេដឹកនាំរបស់ អូសេទីខាងត្បូង (South Ossetia) ដែលជាតំបន់ផ្ដាច់ខ្លួននៅក្នុង ប្រទេសហ្សកហ្ស៊ី ប្រកាសអំពីលទ្ធភាពនៃការធ្វើប្រជាមតិ ២ លើក ស្ដីពីការច្របាច់បញ្ចូលទៅក្នុង សហព័ន្ធរុស្ស៊ី និងបង្រួបបង្រួមជាមួយ អូសេទីខាងជើង (North Ossetia) ដែលជាសាធារណរដ្ឋមួយនៅ រុស្ស៊ី។
សារព័ត៌មាន Sputnik ថ្ងៃនេះបានដកស្រង់សម្ដីរបស់មេដឹកនាំ ដែនដីអូសេទីខាងត្បូង Anatoly Bibilov ឱ្យដឹងថា ដំណើរការនៃការច្របាច់បញ្ចូលទៅក្នុង ប្រទេសរុស្ស៊ី និងបង្រួបបង្រួមជាមួយ អូសេទីខាងជើង នឹងមិនត្រូវបានធ្វើឡើងដំណាលគ្នា ព្រោះតែបញ្ហាផ្លូវច្បាប់។ ដូច្នេះ អូសេទីខាងត្បូង អាចនឹងធ្វើប្រជាមតិ ២ លើក ស្ដីពីបញ្ហានេះ ក្នុងនោះ ប្រជាមតិស្ដីពីការច្របាច់បញ្ចូលទៅក្នុង សហព័ន្ធរុស្ស៊ី អាចនឹងត្រូវបានធ្វើឡើងក្នុងថ្ងៃទី ១០ មេសា ២០២២។
លោក Bibilov បាននិយាយថា «លុះណាតែ អូសេទីខាងត្បូង បានក្លាយជាផ្នែកមួយរបស់ សហព័ន្ធរុស្ស៊ី ទើបការបង្រួបបង្រួមជាមួយ អូសេទីខាងជើង អាចដំណើរការបាន»។ លោកបន្ថែមថា ការចរចាជាមួយ រុស្ស៊ី កំពុងត្រូវបានធ្វើបន្ត។
ដែនដី អូសេទី ស្ថិតនៅជាប់នឹងជួរភ្នំ kavkaz ឬ Caucasus បានក្លាយជាផ្នែកមួយរបស់ ចក្រភពរុស្ស៊ី ក្នុងឆ្នាំ ១៧៧៤។ ឆ្នាំ ១៩២២ ដែនដីនេះត្រូវបានពុះចែកជា ២ ផ្នែក ក្នុងនោះ អូសេទីខាងជើង ស្ថិតក្នុងទឹកដីរបស់ រុស្ស៊ី ចំណែក អូសេទីខាងត្បូង ស្ថិតក្នុងទឹកដីរបស់ ហ្សកហ្ស៊ី។ អូសេទីខាងត្បូង ផ្ដាច់ខ្លួនតាំងពីដើមទសវត្សរ៍ ១៩៩០ ដោយមានសង្គ្រាមកើតឡើងជាច្រើនលើកជាមួយ ហ្សកហ្ស៊ី ក្នុង ៣ ទសវត្សរ៍កន្លងមកនេះ។
ហ្សកហ្ស៊ី ជាប្រទេសមួយដែលធ្លាប់ស្ថិតក្នុង សហភាពសូវៀត នៅត្រង់តំបន់ Kavkaz នៅភាគខាងជើងប្រទេស ជាប់ជាមួយ រុស្ស៊ី នាបច្ចុប្បន្ន។ ទំនាក់ទំនងរវាង ហ្សកហ្ស៊ី និង រុស្ស៊ី តែងមានភាពតានតឹងចាប់តាំងពីផ្ទុះសង្គ្រាមកាលពីឆ្នាំ ២០០៨ នៅពេល ហ្សកហ្ស៊ី វាយប្រហារតំបន់ផ្ដាច់ខ្លួន អាបខាហ្សី (Abkhazia) និង អូសេទីខាងត្បូង។
