កងកម្លាំងនុយក្លេអែរ របស់ កូរ៉េខាងជើង នឹងធ្វើសកម្មភាពបើសិន កូរ៉េខាងត្បូង បង្កឱ្យមានការប្រឈមមុខដាក់គ្នាផ្នែកយោធា ឬផ្ដើមការវាយប្រហារលើ កូរ៉េខាងជើង។
«យើងនឹងមិនចាប់ផ្ដើមការវាយប្រហារមុន បើសិនមិនមានការបង្កហេតុ។ បើសិន កូរ៉េខាងត្បូង ជ្រើសរើសការប្រើប្រាស់កម្លាំងយោធា កងកម្លាំងនុយក្លេអែរ របស់យើងនឹងអនុវត្តតាមភារកិច្ចដែលត្រូវបានប្រគល់» គីម យ៉ូជុង (Kim Yo-jong) អនុប្រធានគណៈកម្មាធិការមជ្ឈិមបក្សពលករកូរ៉េខាងជើង និងជាប្អូនស្រីបង្កើតរបស់ មេដឹកនាំកូរ៉េខាងជើង លោក គីម ជុងអុន បានឱ្យដឹងក្នុងប្រកាសមួយនាថ្ងៃនេះ។
នេះគឺជាប្រកាសទីពីររបស់លោកស្រី គីម យ៉ូជុង ដែលត្រូវបានសារព័ត៌មានរដ្ឋកូរ៉េខាងជើង KCNA ចុះផ្សាយក្នុងអំឡុងប៉ុន្មានថ្ងៃមកនេះ បន្ទាប់ពី រដ្ឋមន្ត្រីការពារជាតិកូរ៉េខាងត្បូង ស៊ូ វុក (Suh Wook) ថ្លែងថា កងទ័ពកូរ៉េខាងត្បូង មានរ៉ុក្កែត ច្រើនប្រភេទ ដែល «មានសមត្ថភាពវាយចំគោលដៅ និងរហ័ស ចំពោះគ្រប់គោលដៅនៅ កូរ៉េខាងជើង»។
មន្ត្រីកូរ៉េខាងជើង សង្កត់ធ្ងន់ថា ប្រទេសនេះប្រឆាំងនឹងជម្លោះដែលអាចរុញច្រានឧបទ្វីបធ្លាក់ទៅក្នុងមហន្តរាយ ដូចសង្គ្រាមកូរ៉េ នៅដើមទសវត្សរ៍ ១៩៥០ ប៉ុន្តែ បានព្រមានថា គ្រប់យ៉ាងអាចផ្លាស់ប្ដូរ អាស្រ័យលើសកម្មភាពរបស់ កូរ៉េខាងត្បូង។
ភាពតានតឹងនៅ ឧបទ្វីបកូរ៉េ កំពុងកើនឡើងក្នុងអំឡុងច្រើនសប្ដាហ៍កន្លង។ ទីក្រុងព្យុងយ៉ាង បានបង្កើនសកម្មភាពនៅទីតាំងសាកល្បងរ៉ុក្កែត និងអាវុធនុយក្លេអែរ ក្រោយពីបាននិយាយកាលពីខែមករាថា ប្រទេសនេះនឹងបញ្ចប់ការបង្កកការសាកល្បងអាវុធ។ កូរ៉េខាងជើង បានបាញ់សាកល្បងរ៉ុក្កែតច្រើនប្រភេទ ចាប់តាំងពីដើមឆ្នាំ ក្នុងនោះក៏មានករណីបាញ់កាំជ្រួចផ្លោងអន្តរទ្វីប Hwasong-១៧ កាលពីខែមីនាផងដែរ។