រូបភាពពីផ្កាយរណបថ្មីបំផុតបង្ហាញថា កងកម្លាំងរបស់ រុស្ស៊ី បានដកចេញពីអាកាសយានដ្ឋាន Antonov ក្នុងទីរួមស្រុក Hostomel ដែលមានចម្ងាយពី រដ្ឋធានីកៀវ ៧ គីឡូម៉ែត្រ ទៅទិសខាងជើង។
មន្ត្រីក្រសួងការពារជាតិអាម៉េរិក ១ រូប កាលពីថ្ងៃទី ៣១ មីនា បានឱ្យដឹងថា ពួកគេជឿថា កងកម្លាំងរបស់ រុស្ស៊ី ទំនងជាបានដកថយចេញពីព្រលានយន្តហោះ Antovov ជាគោលដៅដែលត្រូវបាន កងទ័ពរុស្ស៊ី វាយប្រហារក្នុងថ្ងៃដំបូងនៃយុទ្ធនាការយោធាពិសេសរបស់ ទីក្រុងមូស្គូ នៅ អ៊ុយក្រែន។
ក្រោយមក រូបភាពពីផ្កាយរណបរបស់ Maxar Technologies ដែលថតបានក្នុងថ្ងៃដដែលនោះ បានបញ្ជាក់ថា កងទ័ពរុស្ស៊ី ពិតជាបានដកថយពីព្រលានយន្តហោះនោះមែន ដោយពុំឃើញមានយានយោធា ឬទីតាំងដាក់អាវុធធុនធ្ងន់របស់ រុស្ស៊ី ទៀតនោះទេ។ នៅទីនោះ នៅសល់តែលេណដ្ឋានដែល ទាហានរុស្ស៊ី បានបង្កើតឡើងដើម្បីបាំងការពារខ្លួន។
រុស្ស៊ី បានចាប់ផ្ដើមបើកការឈ្លានពានលើ ទឹកដីអ៊ុយក្រែន កាលពីថ្ងៃទី ២៤ កុម្ភៈ ដើម្បី «បំបាត់ចោលការពង្រីកយោធារបស់ អ៊ុយក្រែន»។ តំណាងក្រុមចរចារបស់ រុស្ស៊ី និង អ៊ុយក្រែន កាលពីម្សិលមិញ បានប្រកាសបន្តកិច្ចពិភាក្សាតាមប្រព័ន្ធវីដេអូ បន្ទាប់ពីបានចរចាគ្នាផ្ទាល់នៅ អ៊ីស្តង់ប៊ុល នៃ ប្រទេសតួកគី កាលពីថ្ងៃទី ២៩ មីនា ដែលត្រូវបានវាយតម្លៃថា វិជ្ជមាន។ ចំណែក ប្រធានាធិបតីអ៊ុយក្រែន វិញ បានឱ្យដឹងថា បានប្រគល់សេចក្ដីព្រាងមួយចំនួនស្ដីពីការធានាសន្តិសុខ ឱ្យបណ្ដាប្រទេស ក្នុងនោះមាន អាម៉េរិក និងសម្ព័ន្ធរបស់ អាម៉េរិក ផងដែរ៕
