មន្ត្រីមន្ទីរបញ្ចកោណ បានឱ្យដឹងថា កងទ័ពរុស្ស៊ី បានដកថយរាប់សិបគីឡូម៉ែត្រ ទៅទិសខាងកើតនៃ រដ្ឋធានីកៀវ និងចាប់ផ្ដើមបង្កើតទីតាំងការពារខ្លួននៅ អ៊ុយក្រែន។
«អ៊ុយក្រែន បានរុញច្រានកងទ័ពរបស់ រុស្ស៊ី ឱ្យថយក្រោយ ៥៥ គីឡូម៉ែត្រ នៅភាគខាងកើត និងភាគឦសាននៃ រដ្ឋធានីកៀវ។ នោះគឺជាប្រែប្រួលដែលធៀបនឹងថ្ងៃម្សិលមិញ។ នៅភាគឦសាន រុស្ស៊ី ជារួម កំពុងជីកលេណដ្ឋាន និងបង្កើតទីតាំងឈរជើងការពារខ្លួន។ មិនមែនពួកគេមិនបន្តវាយលុកទៅមុខ ប៉ុន្តែ ពេលនេះពួកគេមិនព្យាយាមធ្វើ» មន្ត្រីជាន់ខ្ពស់នៃ ក្រសួងការពារជាតិអាម៉េរិក កាលពីថ្ងៃទី ២៨ មីនា បានអះអាងដូច្នេះ។
មន្ទីរបញ្ចកោណ នាថ្ងៃទី ២៩ មីនា បញ្ជាក់ថា កងកម្លាំងរុស្ស៊ី កំពុងស្ថិតនៅចម្ងាយពី រដ្ឋធានីកៀវ ប្រហែល ២០ គម និងត្រូវបានរាំងខ្ទប់នៅទីតាំងដែលមានចម្ងាយប្រហែល ១០ គម ពីទីក្រុង Chernihiv។ ទីតាំងមួយចំនួនរបស់ កងទ័ពរុស្ស៊ី ដែលស្ថិតនៅចម្ងាយប្រហែល ១៥ ទៅ ២០ គម ទៅទិសខាងកើតក្រុង Kharkov កំពុងរងការវាយបកយ៉ាងខ្លាំងក្លាពី កងទ័ពអ៊ុយក្រែន។
បច្ចុប្បន្ន រុស្ស៊ី ហាក់កំពុងផ្ដោតទៅលើតំបន់ផ្ដាច់ខ្លួន Donetsk និង Lugansk នៅភាគខាងកើតអ៊ុយក្រែន។ មន្ត្រីអាម៉េរិក និយាយថា មន្ទីរបញ្ចកោណ ជឿថា ទីក្រុងមូស្គូ កំពុងព្យាយាម «ទាក់ទាញ» កងកម្លាំងរបស់ អ៊ុយក្រែន នៅតំបន់ទាំងនេះ ដើម្បីកុំឱ្យពួកគេអាចពង្រាយកម្លាំងទៅកាន់តំបន់ដទៃ។
ការលើកឡើងខាងលើ បានកើតឡើងមួយថ្ងៃ បន្ទាប់ពីអ្នកនាំពាក្យរបស់ មន្ទីរបញ្ចកោណ John Kirby និយាយថា កងកម្លាំងអ៊ុយក្រែន «វាយបកនៅទីតាំងនានា និងរុញច្រាន កងទ័ពរុស្ស៊ី ឱ្យចេញពីតំបន់មួយចំនួន»៕