រដ្ឋាភិបាលអូស្ត្រាលី ប្រកាសបង្កើតបញ្ជាការដ្ឋានកងទ័ពអវកាស ដែលមានភារកិច្ចធានាឋានៈរបស់ប្រទេសនេះ នៅក្នុងបរិស្ថានអវកាស ដែលនឹងប្រកបដោយ «ភាពចម្រូងចម្រាស»។
«អវកាសកំពុងប្រែទៅជាមមាញឹកជាងមុន និងបានកើតមានជម្លោះ ពិសេសគឺនៅពេលព្រំដែនរវាងការប្រកួតប្រជែង និងជម្លោះ កាន់តែមានភាពស្រពេចស្រពិល តាមរយៈសកម្មភាពតំបន់ប្រផេះ» រដ្ឋមន្ត្រីការពារជាតិអូស្ត្រាលី Peter Dutton ថ្លែងនៅក្នុងពេលបង្ហាញបញ្ជាការដ្ឋានកងទ័ពអវកាស នាថ្ងៃនេះ។
លោក Dutton អះអាងថា អវកាសប្រាកដជានឹងក្លាយជាវិស័យដែលប្រកបដោយអត្ថន័យយោធាធំធេងនៅក្នុងសតវត្សរ៍នេះ។ ក្រសួងការពារជាតិអូស្ត្រាលី ឱ្យដឹងថា បញ្ជាការដ្ឋានកងទ័ពអវកាសអូស្ត្រាលី នឹងមានទ្រង់ទ្រាយតូចនៅគ្រាដំបូង ប៉ុន្តែមិនទាន់បញ្ជាក់លម្អិតអំពីអង្គភាព ឬថវិកាសម្រាប់ស្ថាប័ននេះនៅឡើយ។
បញ្ជាការដ្ឋានកងទ័ពអវកាសអូស្ត្រាលី នឹងត្រូវបានដឹកនាំដោយ Cath Roberts ដែលជាមេបញ្ជាការរងកងទ័ពអាកាសរបស់ប្រទេសនេះ។ បុគ្គលិករបស់ស្ថាប័នថ្មីនេះនឹងត្រូវបានជ្រើសរើសចេញពីកងទ័ពជើងគោក ជើងទឹក និងជើងអាកាសរបស់ អូស្ត្រាលី ក៏ដូចជាមកពីបណ្ដាក្រុមហ៊ុនវិនិយោគឯកជន។
បញ្ជាការដ្ឋានកងទ័ពអវកាសអូស្ត្រាលី នឹងអាចសហការជាមួយ អាម៉េរិក នៅទីអវកាស។ សហរដ្ឋអាម៉េរិក ក្នុងសម័យលោក Donald Trump កាលពីឆ្នាំ ២០១៩ ក៏បានបង្កើត បញ្ជាការដ្ឋានកងទ័ពអវកាស របស់ខ្លួន ដែលទទួលភារកិច្ចក្នុងបេសកកម្មប្រយុទ្ធនៅទីអវកាស៕