អគ្គរដ្ឋទូត Fan Xianrong បានកោតសរសើរចំពោះស្មារតីសាមគ្គីភាពរបស់ ជនជាតិអ៊ុយក្រែន ហើយអះអាងថា ប្រទេសចិន តែងតែគាំទ្រប្រទេសនេះ ក្នុងបញ្ហាសេដ្ឋកិច្ច នយោបាយ។
«យើងនឹងតែងតែគោរពចំពោះ រដ្ឋាភិបាលអ៊ុយក្រែន អភិវឌ្ឍទំនាក់ទំនងដោយយោងទៅលើមូលដ្ឋានសមភាព និងចែករំលែកផលប្រយោធន៍។ យើងក៏គោរពចំពោះផ្លូវដែល ជនជាតិអ៊ុយក្រែន បានជ្រើសរើស ព្រោះនេះគឺជាសិទ្ធិលើអធិបតេយ្យភាពទឹកដីរបស់ប្រទេសនីមួយ» ឯកអគ្គរដ្ឋទូតចិន ប្រចាំ អ៊ុយក្រែន លោក Fan Xianrong ថ្លែងដូច្នេះនៅក្នុងជំនួបមួយជាមួយក្រុមមន្ត្រីទីក្រុង Lviv នៅភាគខាងលិចប្រទេសអ៊ុយក្រែន។
ជំនួបខាងលើត្រូវបានធ្វើឡើងកាលពីថ្ងៃទី ១៤ មីនា ប៉ុន្តែ ទើបត្រូវបានចេញផ្សាយដោយសារព័ត៌មានរបស់ អ៊ុយក្រែន Ukrinform កាលពីថ្ងៃទី ១៦ មីនា។
លោក Fan បានសន្យាថា «ចិន នឹងមិនវាយប្រហារលើ អ៊ុយក្រែន» ប៉ុន្តែ «នឹងជួយគាំទ្រ ពិសេសលើបញ្ហាដែលទាក់ទងនឹងសេដ្ឋកិច្ច»។ លោកបន្ថែមថា «ក្នុងនាមជាឯកអគ្គរដ្ឋទូត ខ្ញុំសូមធានាថា ប្រទេសចិន នឹងនៅតែធ្វើល្អចំពោះ អ៊ុយក្រែន ទាំងសេដ្ឋកិច្ច ទាំងនយោបាយ»។
«ក្នុងស្ថានភាពបច្ចុប្បន្ន យើងនឹងធ្វើសកម្មភាពដោយប្រុងប្រយ័ត្ន។ យើងបានឃើញស្មារតីនៃសាមគ្គីភាពធំធេងរបស់ ប្រជាជនអ៊ុយក្រែន ហើយប្រការនោះមានន័យថាជាកម្លាំង» ឯកអគ្គរដ្ឋទូតចិន បញ្ជាក់។
លោក Maksym Kozytskiy ដែលជាអភិបាលក្រុង Lviv ក៏បានទទួលស្គាល់ថា ពិតជាមានជំនួបជាមួយឯកអគ្គរដ្ឋទូតចិន និងបានបញ្ជាក់ថា ទីក្រុងប៉េកាំង បានផ្ដល់ជំនួយមនុស្សធម៌ ២ លើកមកហើយ ដល់ អ៊ុយក្រែន ហើយលើកទី ៣ នឹងមកដល់នៅក្នុងសប្ដាហ៍នេះ៕
