រុស្ស៊ី កំពុងបង្ខាំងយន្តហោះពាណិជ្ជកម្មល្បឿនលឿនរាប់រយគ្រឿងរបស់បណ្ដាក្រុមហ៊ុនអាម៉េរិក និង អឺរ៉ុប ក្នុងគ្រាដែលភាពតានតឹងជាមួយបស្ចិមលោកកើនឡើងខ្ពស់។
ប្រធានាធិបតីរុស្ស៊ី វ្លាឌីមៀ ពូទីន កាលពីដើមសប្ដាហ៍ បានចុះហត្ថលេខាលើសេចក្ដីព្រាងច្បាប់មួយដែលស្ថិតក្នុងវិធានការឆ្លើយតបទៅនឹងទណ្ឌកម្មរបស់លោកខាងលិច អនុញ្ញាតឱ្យបណ្ដាក្រុមហ៊ុនអាកាសចរណ៍រុស្ស៊ី ឈរឈ្មោះក្នុងការចុះបញ្ជីយន្តហោះដែលជួលពីបណ្ដាក្រុមហ៊ុនបរទេស។ យន្តហោះទាំងនេះ នឹងត្រូវបានផ្ដល់វិញ្ញាបនបត្របញ្ជាក់ថា មានលក្ខខណ្ឌគ្រប់គ្រាន់សម្រាប់ការហោះហើរពីសំណាក់អាជ្ញាធរក្នុងស្រុក។
ប្រការខាងលើមានន័យថា បណ្ដាក្រុមហ៊ុនអាកាសចរណ៍រុស្ស៊ី អាចប្រមូលយកយន្តហោះដែលកំពុងជួលពីបរទេស និងប្រើប្រាស់សម្រាប់ផ្ដល់សេវាដឹកជញ្ជូនក្នុងស្រុក។ ម្ចាស់យន្តហោះបរទេសទាំងនេះក៏ពិបាកប្រមូលយន្តហោះទាំងនោះត្រលប់ទៅវិញ បើសិនមិនមានការអនុញ្ញាតពី រដ្ឋាភិបាលរុស្ស៊ី។
ទណ្ឌកម្មរបស់ អាម៉េរិក និង អឺរ៉ុប ដែលដាក់លើ រុស្ស៊ី មុននោះ តម្រូវឱ្យបណ្ដាក្រុមហ៊ុនដែលផ្ដល់សេវាកម្មឱ្យជួលយន្តហោះ ប្រមូលត្រលប់មកវិញនូវយន្តហោះទាំងអស់ដែលបានឱ្យក្រុមហ៊ុនរបស់ រុស្ស៊ី ជួល នៅចុងខែនេះ។
ទិន្នន័យពី Cirium បង្ហាញថា ៨៥% នៃយន្តហោះដែលផលិតដោយបរទេសនៅ រុស្ស៊ី កំពុងស្ថិតនៅជាកម្មសិទ្ធិរបស់បណ្ដាក្រុមហ៊ុនផ្ដល់សេវាកម្មឱ្យជួលយន្តហោះ។ តម្លៃសរុបរបស់យន្តហោះទាំងនេះ គឺប្រមាណ ១២.៤ ពាន់លានដុល្លារអាម៉េរិក។
ក្រុមហ៊ុននានាដែលដាក់ឱ្យជួលយន្តហោះ បច្ចុប្បន្នមិនទាន់មានការឆ្លើយតបណាមួយចំពោះសកម្មភាពរបស់ រុស្ស៊ី និងមិនទាន់ដឹងច្បាស់ថា ពួកគេមានបំណងប្រមូលយកយន្តហោះមកវិញ ឬយ៉ាងណានៅឡើយ។