អាចម៍ផ្កាយ ២០២២ EB៥ ហោះសំដៅចូលបរិយាកាសផែនដីកាលពីថ្ងៃទី ១១ មីនា ហើយក៏បានផ្ទុះឆេះ និងបញ្ចេញថាមពលប្រហាក់ប្រហែលនឹងរំសេវ TNT ២,០០០ តោន។
តារាវិទូ Krisztian Sarneczky បានតាមដាន ២០២២ EB៥ ដោយប្រើប្រាស់កែវយឺត Schmidt នៅស្ថានីយភ្នំ Peszkesteto។ ក្រោយរយៈពេល ២ ម៉ោងនៃការតាមដាន អាចម៍ផ្កាយនេះក៏បានហោះសំដៅចូលក្នុងបរិយាកាសផែនដី នៅតំបន់ភាគខាងជើង អ៊ីស្លង់។ ២០២២ EB៥ ដែលមានទទឹងប្រហែល ៣ ម៉ែត្រ ផ្លាស់ទីក្នុងល្បឿនប្រហែល ៦៣,៧០០ គីឡូម៉ែត្រ/ម៉ោង មិនស្ថិតក្នុងក្រុមដែលអាចបង្កគ្រោះថ្នាក់ដល់ផែនដីនោះទេ។
ក្រុមអ្នកវិទ្យាសាស្ត្រមិនទាន់ដឹងច្បាស់ថា ក្រោយការផ្ទុះ មានអ្វីកើតឡើងចំពោះអាចម៍ផ្កាយនេះនៅឡើយ។ ប្រហែលវាបានឆេះខ្ទេចនៅក្នុងបរិយាកាស ឬធ្លាក់ចូលទៅក្នុងមហាសមុទ្រអាកទិក។
អង្គការអាចម៍ផ្កាយអន្តរជាតិ (IMO) កំពុងស្វែងរកព័ត៌មានទាក់ទងនឹងការធ្លាក់អាចម៍ផ្កាយខាងលើ។ មនុស្សមួយចំនួននៅ អ៊ីស្លង់ បានមើលឃើញពន្លឺ ឬឮសំឡេងផ្ទុះ នៅពេលនោះ។
ការផ្ទុះអាចម៍ផ្កាយនេះត្រូវបាន Peter Brown ដែលជាអ្នកវិទ្យាសាស្ត្រប្រចាំសាកលវិទ្យាល័យ Western នៅ កាណាដា គណនាឃើញថា មានកម្លាំងប្រហាក់ប្រហែលនឹងរំសេវ TNT ២,០០០ តោន។
កន្លងមក មានអាចម៍ផ្កាយតែ ៤ ដុំប៉ុណ្ណោះ រួមមាន ២០០៨ TC៣, ២០១៤ AA, ២០១៨ LA និង ២០១៩ MO ដែលធ្លាប់ត្រូវបានអ្នកវិទ្យាសាស្ត្ររកឃើញក្នុងរយៈពេលខ្លី នៅមុនពេលពួកវាហោះមកបុកផែនដី។ ២០២២ EB៥ បានក្លាយជាអាចម៍ផ្កាយទី ៥ ក្នុងបញ្ជីខាងលើនេះ៕
