រដ្ឋាភិបាលអាល្លឺម៉ង់ បញ្ជាទិញយន្តហោះចម្បាំង F-៣៥ ចំនួន ៣៥ គ្រឿង ពី សហរដ្ឋអាម៉េរិក បំណងស្ដារយុទ្ធសាស្ត្រ ក្នុងស្ថានការណ៍តានតឹងចេះតែកើនឡើងនៅ អឺរ៉ុបខាងកើត។
«ក្រោយពីបានពិនិត្យម៉ត់ចត់ ខ្ញុំសម្រេចចិត្តបញ្ជាទិញយន្តហោះចម្បាំង F-៣៥ ជំនួសយន្តហោះចម្បាំង Tornado ដើម្បីធានាបាននូវតួនាទីចែករំលែកសមត្ថភាពកំញើញផ្នែកអាវុធនុយក្លេអែរ» រដ្ឋមន្ត្រីក្រសួងការពារជាតិអាល្លឺម៉ង់ Christine Lambretcht ប្រកាសកាលពីថ្ងៃទី ១៤ មីនា។
Tornado គឺជាយន្តហោះចម្បាំងតែមួយប្រភេទគត់ដែល អាល្លឺម៉ង់ កំពុងប្រើប្រាស់ មានសមត្ថភាពបំពាក់ក្បាលគ្រាប់នុយក្លេអែររបស់ សហរដ្ឋអាម៉េរិក ក្នុងសេណារីយោ មានសង្គ្រាមកើតឡើង។
សហរដ្ឋអាម៉េរិក មានកិច្ចព្រមព្រៀងរក្សាទុកអាវុធនុយក្លេអែរ នៅលើទឹកដីរបស់ អាល្លឺម៉ង់ ក្នុងក្របខណ្ឌការពាររួមរបស់ ណាតូ។ ក្រៅពីនេះ អាម៉េរិក ក៏មានអាវុធនុយក្លេអែរ នៅក្នុង ប្រទេសបែលហ្សិក អ៊ីតាលី ហូឡង់ និង តួកគី ដែលជាសមាជិករបស់ សម្ព័ន្ធយោធាណាតូ។
ការសម្រេចចិត្តបញ្ជាទិញ F-៣៥ ត្រូវបាន រដ្ឋាភិបាលអាល្លឺម៉ង់ ប្រកាស បន្ទាប់ពី នាយករដ្ឋមន្ត្រី Olaf Scholz ប្រកាសអំពីកញ្ចប់ថវិកា ១០០ ពាន់លានអឺរ៉ូ (ជាង ១០៩ ពាន់លានដុល្លារអាម៉េរិក) ដើម្បីធ្វើទំនើបកម្មយោធា។ ការសម្រេចនេះក៏យោងទៅតាមស្ថានការណ៍តានតឹងដែលចេះតែឡើងកម្ដៅរវាង អឺរ៉ុប និង រុស្ស៊ី ទាក់ទិននឹងសង្គ្រាមនៅ អ៊ុយក្រែន។
ក្រៅពី F-៣៥ អាល្លឺម៉ង់ ក៏គ្រោងនឹងបញ្ជាទិញយន្តហោះចម្បាំង Eurofighter របស់ Airbus ចំនួន ១៥ គ្រឿងផងដែរ សម្រាប់បំពេញបេសកកម្មក្នុងសង្គ្រាមអេឡិចត្រូនិក៕
