នៅពេលមនុស្សរាប់ពាន់នាក់មកពីបរទេស ស្ម័គ្រចិត្តចូលរួមជួយ អ៊ុយក្រែន ក្នុងការធ្វើសង្គ្រាមប្រឆាំង រុស្ស៊ី មនុស្សមួយចំនួនអាចត្រូវប្រឈមមុខនឹងបញ្ហាផ្លូវច្បាប់។
ពលរដ្ឋរបស់ កាណាដា, ហ្សកហ្ស៊ី, ឥណ្ឌា, ជប៉ុន, អង់គ្លេស និង សហរដ្ឋអាម៉េរិក ស្ថិតក្នុងចំណោមអ្នកស្ម័គ្រចិត្តចូលជួយធ្វើសង្គ្រាមនៅ អ៊ុយក្រែន ដើម្បីប្រឆាំងនឹង កងទ័ពរុស្ស៊ី នេះបើតាមសារព័ត៌មាន Reuters និងស្ថាប័នព័ត៌មានជាច្រើនទៀត។
ទាក់ទិននឹងបញ្ហាខាងលើ ច្បាប់របស់ប្រទេសខ្លះ មិនយកទោសពៃរ៍ ចំណែកប្រទេសខ្លះក៏ថា មិនស្របច្បាប់៖
សហរដ្ឋអាម៉េរិក
ក្រសួងការបរទេសអាម៉េរិក ឱ្យដឹងថា ពលរដ្ឋប្រទេសនេះមិនត្រូវបានហាមការចូលបម្រើក្នុងជួរកងទ័ពរបស់ប្រទេសដទៃ។ ការចូលរួមក្នុងជួរកងទ័ពបរទេស ឬប្រយុទ្ធប្រឆាំងនឹងប្រទេសមួយដែលមានសន្តិភាពជាមួយ សហរដ្ឋអាម៉េរិក អាចត្រូវបានយកមកសំអាងដើម្បីបោះបង់សិទ្ធិជាពលរដ្ឋដោយស្ម័គ្រចិត្ត ប៉ុន្តែ បើយោងតាមមាត្រានានារបស់តុលាការកំពូលអាម៉េរិក ការប្រយុទ្ធសម្រាប់កងទ័ពបរទេស មិនអាចត្រូវបានចាត់ទុកជាមូលដ្ឋានដើម្បីដកសិទ្ធិជាពលរដ្ឋរបស់ ជនជាតិអាម៉េរិក ឡើយ។
អូស្ត្រាលី, អង់គ្លេស, ឥណ្ឌា
យោងតាមការណែនាំចំពោះការធ្វើដំណើរ ដែលបានធ្វើបច្ចុប្បន្នភាពកាលពីថ្ងៃទី ៩ មីនា របស់ ក្រសួងការបរទេសអង់គ្លេស ពលរដ្ឋប្រទេសនេះដែលបានទៅកាន់ អ៊ុយក្រែន ដើម្បីចូលរួមធ្វើសង្គ្រាម អាចត្រូវបានចោទប្រកាន់ទោសនៅពេលត្រលប់មកវិញ។
ច្បាប់របស់ អង់គ្លេស ដែលត្រូវបានធ្វើវិសោធនកម្មចុងក្រោយកាលពីឆ្នាំ ១៨៧០ បានហាមពលរដ្ឋទៅចូលរួមជាមួយកងទ័ពបរទេសដើម្បីប្រយុទ្ធប្រឆាំងនឹងបណ្ដាប្រទេសដែលមានសន្តិភាពជាមួយ អង់គ្លេស ប៉ុន្តែ វាមិនត្រូវបានអនុវត្តសម្រាប់ជម្លោះប្រដាប់អាវុធសម័យទំនើប។ រដ្ឋមន្ត្រីការបរទេសអង់គ្លេស ដំបូងឡើយបានគាំទ្រដល់ពលរដ្ឋដែលស្ម័គ្រចិត្តទៅធ្វើសង្គ្រាមជួយ អ៊ុយក្រែន ប៉ុន្តែ ក្រោយមកបែរជាព្រមានមិនឱ្យពលរដ្ឋទៅកាន់ អ៊ុយក្រែន ទៅវិញ។
នាយករដ្ឋមន្ត្រីអូស្ត្រាលី Scott Morrison បានអំពាវនាវឱ្យពលរដ្ឋរបស់ប្រទេសនេះ កុំទៅចូលរួមធ្វើសង្គ្រាមនៅ អ៊ុយក្រែន ដោយលើកឡើងអំពីភាពមិនប្រាកដប្រជានៅក្នុងច្បាប់របស់ប្រទេសនេះ។
ក្រសួងមហាផ្ទៃរបស់ ឥណ្ឌា វិញ មិនបានឆ្លើយតបនឹងសំណើសុំការអធិប្បាយអំពីភាពស្របច្បាប់ទាក់ទងនឹងពលរដ្ឋរបស់ ឥណ្ឌា ដែលទៅចូលរួមធ្វើសង្គ្រាមជួយ អ៊ុយក្រែន។
ក្នុងករណីពលរដ្ឋឥណ្ឌា បានទៅធ្វើសង្គ្រាមនៅ អ៊ីរ៉ាក់ កាលពីឆ្នាំ ២០១៥ ក្រសួងមហាផ្ទៃឥណ្ឌា បានប្រកាសថា ការអនុញ្ញាតឱ្យពលរដ្ឋឥណ្ឌា ទៅចូលរួមជម្លោះប្រដាប់អាវុធនៅប្រទេសដទៃ «នឹងនាំឱ្យមានការចោទប្រកាន់ថា រដ្ឋាភិបាលឥណ្ឌា កំពុងជំរុញអំពើភេរវកម្មនៅបរទេស»។
ប្រទេសដែលគាំទ្រ
អាល្លឺម៉ង់ បានឱ្យដឹងថា ប្រទេសនេះនឹងមិនយកទោសពៃរ៍ ចំពោះពលរដ្ឋដែលស្ម័គ្រចិត្តទៅចូលរួមធ្វើសង្គ្រាមនៅ អ៊ុយក្រែន។ ចំណែកក្រុមមេដឹកនាំរបស់ ដាណឺម៉ាក និង ឡេតូនី អះអាងថា នឹងអនុញ្ញាត បើសិនពលរដ្ឋរបស់ពួកគេស្ម័គ្រចិត្ត។ រីឯ រដ្ឋមន្ត្រីការពារជាតិរបស់ កាដាណា វិញ និយាយថា នេះគឺជាបញ្ហាដែលស្ថិតក្នុងការសម្រេចចិត្តជាលក្ខណៈបុគ្គល។
ករណីទាហានបរទេសត្រូវបានចាប់ខ្លួន
សាស្ត្រាចារ្យនៃសាលារដ្ឋបាល ការបរទេស និងយុទ្ធសាស្ត្ររបស់ ប្រទេសអ៊ីស្រាអែល ថា ច្បាប់អន្តរជាតិស្នើឱ្យ រុស្ស៊ី ផ្ដល់របបមួយចំនួនដល់ទាហានដែលត្រូវបានចាប់ខ្លួន ដោយមិនគិតអំពីសញ្ជាតិ ដូចជារបបអាហារ ទឹក និងការព្យាបាល។ ក៏ប៉ុន្តែ អ្នកនាំពាក្យរបស់ក្រសួងការពារជាតិរុស្ស៊ី កាលពីសប្ដាហ៍មុនបានអះអាងផ្ទុយពីនេះ។
ទាហានស្ម័គ្រចិត្តអាចត្រូវបានចោទប្រកាន់ដែរ ឬអត់?
ក្រុមអ្នកជំនាញផ្នែកច្បាប់ បានឱ្យដឹងថា ទាហានបរទេសស្ម័គ្រចិត្តទាំងឡាយនឹងប្រយុទ្ធក្នុងនាមជាសមាជិករបស់ កងទ័ពអ៊ុយក្រែន ដូច្នេះ ពួកគេនឹងមិនត្រូវប្រឈមមុខនឹងការចោទប្រកាន់នៅឯប្រទេសកំណើត លើកលែងតែលទ្ធភាពនៃការចោទប្រកាន់ពីបទឧក្រិដ្ឋកម្មសង្គ្រាម ឬសកម្មភាពស្រដៀងគ្នានេះ៕