មហាសេដ្ឋីដែលមានទ្រព្យច្រើនជាងគេបង្អស់ក្នុងពិភពលោក «បបួល ប្រធានាធិបតីរុស្ស៊ី ភ្នាល់ការប្រកួតមួយទល់នឹងមួយ» ដោយមានរង្វាន់ជា ទឹកដីអ៊ុយក្រែន។
«ខ្ញុំភ្នាល់ជាមួយលោក វ្លាឌីមៀ ពូទីន មួយស្មើ។ រង្វាន់ក្នុងការភ្នាល់នេះគឺជា អ៊ុយក្រែន» មហាសេដ្ឋីអាម៉េរិក លោក អ៊ីឡុន ម៉ាស (Elon Musk) សរសេរនៅបណ្ដាញសង្គម Twitter កាលពីម្សិលមិញដូច្នេះ។ «តើលោកហ៊ានទទួលយកការភ្នាល់លើការប្រកួតនេះអត់» មហាសេដ្ឋីវ័យ ៥០ រូបនេះ សរសេរបន្ថែមជា ភាសារុស្ស៊ី។
លោក អ៊ីឡុន ម៉ាស បញ្ជាក់ថា លោក «និយាយដោយភាពម៉ឺងម៉ាត់បំផុត» បន្ទាប់ពីអ្នកតាមដានមួយចំនួននៅលើ Twitter យល់ថា លោកមិនទាន់ពិចារណាឱ្យបានច្បាស់អំពីការបបួលភ្នាល់។ «បើសិនជាលោក ពូទីន អាចបំបាក់មុខបស្ចិមលោកបានដោយងាយ គាត់នឹងទទួលយកការដាក់ភ្នាល់ ប៉ុន្តែ គាត់នឹងមិនធ្វើដូច្នេះ» ម្ចាស់ Tesla ឱ្យដឹងដូច្នេះ។
លោក អ៊ីឡុន ម៉ាស ក៏បាន tag គណនី Twitter របស់តំណាងប្រធានាធិបតីរុស្ស៊ី ទៅក្នុងសាររបស់លោកផងដែរ។ វិមានក្រឹមឡាំង មិនទាន់បញ្ចេញប្រតិកម្មអ្វីទៅនឹងព័ត៌មាននេះនៅឡើយ។
អគ្គនាយកប្រតិបត្តិរបស់ SpaceX បានសម្ដែងការគាំទ្រចំពោះ អ៊ុយក្រែន តាំងតែពីពេល រុស្ស៊ី ប្រកាសបើកយុទ្ធនាការយោធានៅប្រទេសនេះ។ លោក អ៊ីឡុន ម៉ាស ក៏បានឆ្លើយតបទៅនឹងការស្នើសុំជំនួយពី ទីក្រុងកៀវ ដោយការបើកប្រព័ន្ធអ៊ីនធើណិតពីផ្កាយរណប Starlink នៅ អ៊ុយក្រែន និងបានបញ្ជូនឧបករណ៍ដើម្បីស្ដារប្រព័ន្ធសម្រាប់តំបន់ទាំងឡាយដែលដាច់អ៊ីនធើណិត ដោយសារសង្គ្រាមនៅ អ៊ុយក្រែន ដែលបញ្ឆេះឡើងដោយ រុស្ស៊ី៕