ប្រទេសអូស្ត្រាលី និង ប្រទេសហូឡង់ សហការគ្នាដាក់ពាក្យប្ដឹងប្រឆាំង រុស្ស៊ី ទាក់ទងនឹងករណីបាញ់ទម្លាក់យន្តហោះ MH១៧ នៅភាគខាងកើតនៃ ប្រទេសអ៊ុយក្រែន កាលពីឆ្នាំ ២០១៤។
យោងតាម Reuters ប្រទេសទាំងពីរខាងលើដាក់ពាក្យប្ដឹងឡើងទៅកាន់អង្គការអាកាសចរណ៍ស៊ីវិលអន្តរជាតិ (ICAO) ស្ដីពីករណីបាញ់ទម្លាក់យន្តហោះ MH១៧ របស់ក្រុមហ៊ុនអាកាសចរណ៍ Malaysia Airlines កាលពី ៨ ឆ្នាំមុន។
នៅក្នុងសេចក្ដីប្រកាសព័ត៌មានបានចេញផ្សាយនៅថ្ងៃទី ១៤ មីនា នាយករដ្ឋមន្ត្រីអូស្ត្រាលី Scott Morrison និង រដ្ឋមន្ត្រីការបរទេសអូស្ត្រាលី Marise Payne យល់ថា រុស្ស៊ី ត្រូវទទួលខុសត្រូវស្របតាមច្បាប់អន្តរជាតិចំពោះករណីនេះ ហើយសកម្មភាពនៅ ICAO គឺជាការតវ៉ារកយុត្តិធម៌ជូនជនរងគ្រោះ ២៩៨ នាក់ ក្នុងនោះមាន ៣៨ នាក់ ជា ពលរដ្ឋអូស្ត្រាលី។
នេះគឺជាករណីប្ដឹងដាច់ដោយឡែកពីសវនាការនៅ ហូឡង់ ដែលកំពុងកាត់ទោសជនសង្ស័យ ៤ នាក់ ដែលត្រូវទទួលខុសត្រូវរឿងព្រហ្មទណ្ឌឯកជនទាក់ទងនឹងករណីបាញ់ទម្លាក់យន្តហោះខាងលើ។
ជើងហោះហើរ MH១៧ ពី Amsterdam (ហូឡង់) ទៅកាន់ Kuala Lumpur (ម៉ាឡេស៊ី) កាលពីថ្ងៃទី ១៧ កក្កដា ២០១៤ ត្រូវបានគេបាញ់ទម្លាក់ពីដែនអាកាសភាគខាងកើតរបស់ អ៊ុយក្រែន ដែលគ្រប់គ្រងដោយក្រុមផ្ដាច់ខ្លួន។ ក្រុមអ្នកស៊ើបអង្កេតជឿថា យន្តហោះ Boeing ៧៧៧ នោះ ត្រូវគ្រាប់រ៉ុក្កែតប្រឆាំងអាកាសដែលផលិតដោយ រុស្ស៊ី ហើយប្រព័ន្ធរុក្កែតនេះ មិនយូរប៉ុន្មានក៏ត្រូវបាននាំត្រលប់ទៅកាន់ រុស្ស៊ី វិញ។
រុស្ស៊ី តែងតែទាត់ចោលរាល់ការចោទប្រកាន់ និងលើកឡើងនូវការសន្និដ្ឋានជាច្រើន បើទោះត្រូវបានក្រុមអ្នកស៊ើបអង្កេតអន្តរជាតិច្រានចោល ព្រោះយល់ថា ខ្វះភ័ស្ដុតាង។
តាមគម្រោង តុលាការរបស់ ហូឡង់ នឹងកាត់ទោសចំពោះ ពលរដ្ឋរុស្ស៊ី ៣ នាក់ និងពលរដ្ឋអ៊ុយក្រែន ម្នាក់ នៅក្នុងឆ្នាំនេះ ទាក់ទងនឹងករណីខាងលើ។ ជនជាប់ចោទទាំងនេះ មិនទាន់ត្រូវបានចាប់ខ្លួន ហើយក៏ធ្លាប់បានបង្ហាញខ្លួនក្នុងតុលាការនៅឡើយ៕
