ជំទាវទីមួយ Olena Zelenska បានសរសេរសំបុត្រផ្ញើទៅកាន់សារព័ត៌មានអន្តរជាតិ និយាយអំពីសោកនាដកម្មក្នុងវិបត្តិសង្គ្រាមនៅ អ៊ុយក្រែន និងជឿថា ប្រទេសនេះនឹង «ដណ្ដើមបានជ័យជំនះ»។
ក្នុងសំបុត្រដែលមានចំណងជើងថា «ខ្ញុំធ្វើជាសាក្សី» ដែលត្រូវបានប្រកាសលើ Telegram កាលពីថ្ងៃទី ៩ មីនា លោកជំទាវទីមួយរបស់ អ៊ុយក្រែន Olena Zelenska យល់ថា ប្រធានាធិបតីរុស្ស៊ី លោក ពូទីន បានវាយតម្លៃទាបចំពោះ «សាមគ្គីភាពគ្មានទីបញ្ចប់» របស់ ប្រជាជនអ៊ុយក្រែន។
ក្នុងសំបុត្រ លោកស្រី Olena វ័យ ៤៤ ឆ្នាំ សរសេរថា «សោកនាដកម្មទាំងឡាយត្រូវបានគេមើលឃើញនៅ អ៊ុយក្រែន» និងបានរៀបរាប់ឈ្មោះកុមារមួយចំនួនដែលបានស្លាប់នៅក្នុងយុទ្ធនាការយោធារបស់ រុស្ស៊ី។
«ប្រហែលជាប្រការដែលគួរឱ្យភ័យខ្លាចបំផុតក្នុងជម្លោះប្រដាប់អាវុធនេះ នោះគឺការខាតបង់សម្រាប់កុមារ។ កុមារ Alice អាយុ ៨ ឆ្នាំ បានស្លាប់នៅលើដងផ្លូវក្នុងក្រុង Okhtyrka បើទោះជាជីតាបានព្យាយាមការពារ។ កុមារ Polina នៅ កៀវ ក៏បានបាត់បង់ជីវិតទៅជាមួយឪពុកម្ដាយ ព្រោះតែត្រូវបំណែកគ្រាប់កាំភ្លើងធំ» លោកស្រី Olena សរសេរដូច្នេះ និងជាច្រើនទៀត។
ទោះជាយ៉ាងនេះក៏ដោយ លោកស្រីអះអាងថា ប្រជាជនរបស់ប្រទេសនេះ «នឹងមិនចុះចាញ់ជាដាច់ខាត»។ លោកស្រីសង្កត់ធ្ងន់ថា «យើងនឹងឈ្នះ ព្រោះតែការសាមគ្គីរបស់យើង ព្រោះតែក្ដីស្រលាញ់ចំពោះ អ៊ុយក្រែន»។
បច្ចុប្បន្ន ទីតាំងស្នាក់នៅរបស់លោកជំទាវទីមួយរបស់ អ៊ុយក្រែន មិនទាន់ត្រូវបានគេបង្ហើបឱ្យដឹងច្បាស់នៅឡើយ។ កាលពីសប្ដាហ៍មុន ប្រធានាធិបតីអ៊ុយក្រែន លោក Zelensky បានប្រកាសថា គ្រួសាររបស់លោក កំពុងស្ថិតនៅក្នុង ប្រទេសអ៊ុយក្រែន ហើយលោកស្រី Olena ក៏បានអះអាងប្រការនេះនៅក្នុងសំបុត្រខាងលើ។
លោកស្រី Olena ឱ្យដឹងថា មូលហេតុដែលនាំឱ្យមានការសរសេរសំបុត្រនេះ ក៏ព្រោះតែទទួលបានសំណូមពរជាច្រើនពីបណ្ដាសារព័ត៌មានអត្តរជាតិ ដែលស្នើឱ្យលោកស្រីចែករំលែកបញ្ហានៅ អ៊ុយក្រែន ហើយសំបុត្រនេះគឺជាការឆ្លើយតប៕
