សហរដ្ឋអាម៉េរិក និង ណាតូ បានជញ្ជូនអាវុធប្រឆាំងរថក្រោះជាង ១៧,០០០ ដើម ទៅឱ្យ ប្រទេសអ៊ុយក្រែន ក្នុងរយៈពេលមិនដល់ ១ សប្ដាហ៍ ក្នុងនោះមានទាំង មីស៊ីល Javelin ផងដែរ។
សារព័ត៌មាន New York Times កាលពីថ្ងៃទី ៦ មីនា បានរាយការណ៍ថា អាវុធប្រឆាំងរថក្រោះរាប់ពាន់ដើមត្រូវបានជញ្ជូនដល់ព្រំដែនរវាង ប៉ូឡូញ និង រូម៉ានី ដោយដឹកតាមយន្តហោះយោធាធំៗជាច្រើនគ្រឿង។ ក្រោយមក អាវុធទាំងនេះត្រូវបានដឹកតាមផ្លូវគោកទៅកាន់ រដ្ឋធានីកៀវ និងបណ្ដាទីក្រុងរបស់ អ៊ុយក្រែន។
រុស្ស៊ី កំពុងផ្ដោតការវាយប្រហារលើតំបន់ផ្សេងៗរបស់ អ៊ុយក្រែន និងមិនទាន់បង្វែរគោលដៅទៅកាន់ផ្លូវដឹកអាវុធពីទិសខាងលិច ប៉ុន្តែ ប្រការនេះនឹងមិនអូសបន្លាយពេលយូរទៀតទេ។
មួយថ្ងៃបន្ទាប់ពី រុស្ស៊ី បើកការឈ្លានពានកាលពីថ្ងៃទី ២៤ កុម្ភៈ លើ អ៊ុយក្រែន សេតវិមាន បានអនុម័តកញ្ចប់អាវុធ និងសម្ភារយោធាតម្លៃ ៣៥០ លានដុល្លារ ក្នុងនោះមាន មីស៊ីល ប្រឆាំងរថក្រោះ Javelin និង មីស៊ីលការពារដែនអាកាសបំពាក់លើស្មា Stringer ផងដែរ ដើម្បីផ្ដល់ឱ្យ អ៊ុយក្រែន។
ក្រៅពីជំនួយខាងលើ កងកម្លាំងពីបញ្ជាការដ្ឋានផ្នែកបច្ចេកវិទ្យារបស់ អាម៉េរិក ដែលកំពុងធ្វើសកម្មភាពនៅមូលដ្ឋាននានាជុំវិញ តំបន់អឺរ៉ុបខាងកើត ក៏បានត្រៀមខ្លួនរួចរាល់ដើម្បីធ្វើអន្តរាគមន៍ ប្រឆាំងការវាយប្រហារផ្នែកឌីជីថល និងព័ត៌មានទំនាក់ទំនងពី រុស្ស៊ី។