ប្រជាជននៅក្នុងបណ្ដាប្រទេសលោកខាងលិច ដូចជា អង់គ្លេស បារាំង និង សហរដ្ឋអាម៉េរិក នាំគ្នាចេញធ្វើបាតុកម្មប្រឆាំង បន្ទាប់ពី រុស្ស៊ី បានបើកយុទ្ធនាការយោធា លុកលុយ ប្រទេសអ៊ុយក្រែន។
ប្រធានាធិបតី ពូទីន កាលពីថ្ងៃទី ២៤ កុម្ភៈ បានប្រកាសបញ្ជូនទ័ពចូលឈ្លានពាន អ៊ុយក្រែន ដោយយល់ថា រុស្ស៊ី មិនមានអារម្មណ៍សុវត្ថិភាព មិនអាចរីកចម្រើន ឬមានជីវិត នៅចំពោះមុខការគំរាមកំហែងជាច្រចាំពី អ៊ុយក្រែន។
ក្រោយការប្រកាសរបស់លោក ពូទីន ប្រជាជននៅក្នុងប្រទេសជាច្រើន នៅបស្ចិមលោក និងនៅ អាស៊ី ដូចជា ជប៉ុន និង រុស្ស៊ី ជាដើម បាននាំគ្នាចេញធ្វើបាតុកម្មប្រឆាំងនឹងសង្គ្រាម។
នៅ រុស្ស៊ី បាតុកម្មប្រឆាំងការឈ្លានពានរបស់ រុស្ស៊ី ទៅលើ អ៊ុយក្រែន ត្រូវបានធ្វើឡើងកាលពីថ្ងៃទី ២៤ កុម្ភៈ ប៉ុន្តែ ត្រូវប្រឈមមុខជាមួយក្រុមប៉ុលិស។ រុស្ស៊ី ហាមធ្វើបាតុកម្មដោយចិត្តឯងក្នុងទ្រង់ទ្រាយធំ អ្នករំលោភច្បាប់នេះអាចត្រូវបានចាប់ដាក់ពន្ធនាគារ។ Washington Post ដកស្រង់ប្រភពព័ត៌មានពី អង្គការសិទ្ធិមនុស្ស OVD-Info ឱ្យដឹងថា មនុស្សជាង ១,៧០០ នាក់ នៅក្នុងទីក្រុងយ៉ាងតិច ៤៧ នៅ រុស្ស៊ី ត្រូវបានចាប់ខ្លួន។
ក្រុមប្រទេសបស្ចិមលោក ក្នុងនោះមាន អាម៉េរិក ជាដើម បានរិះគន់ថា រុស្ស៊ី វាយប្រហារលើ អ៊ុយក្រែន ដោយមិនសមហេតុផល។ ក៏ប៉ុន្តែ សហរដ្ឋអាម៉េរិក និងសម្ព័ន្ធមិត្តណាតូ អះអាងថា មិនចូលរួមធ្វើសង្គ្រាមនៅ អ៊ុយក្រែន នោះឡើយ។
