ប្រធានាធិបតីអ៊ុយក្រែន បានបញ្ជាក់ថា រុស្ស៊ី កំពុងផ្លោងរ៉ុក្កែត មកលើទីក្រុងនានារបស់ អ៊ុយក្រែន ប៉ុន្តែ សង្កាត់ធ្ងន់ថា កងទ័ពរុស្ស៊ី ភាគច្រើន កំពុងត្រូវបានវាយស្កាត់ទប់ដំណើរ។
លោក Zelensky ថ្លែងថា រុស្ស៊ី បានបន្តការវាយប្រហារដោយ រ៉ុក្កែត ចាប់ពីម៉ោង ៤ ទៀបភ្លឺ (ម៉ោង ៩ នៅ ភ្នំពេញ) ប៉ុន្តែ កងទ័ពថ្មើរជើងរបស់ រុស្ស៊ី ភាគច្រើន កំពុងត្រូវបាន កងទ័ពអ៊ុយក្រែន វាយទប់ស្កាត់ពីច្រើនទិស។ លោកក៏បានចោទថា ការវាយប្រហាររបស់ រុស្ស៊ី សំដៅលើទាំងគោលដៅកងទ័ព និងស៊ីវិល។
កាលពីប៉ុន្មានម៉ោងកន្លងទៅនេះ ក្រសួងការពារជាតិអ៊ុយក្រែន បានឱ្យដឹងថា កងទ័ពរបស់ប្រទេសនេះ បានសម្លាប់ និងបង្ករបួសដល់ ទាហារុស្ស៊ី ៨០០ នាក់។ ក្រសួងនេះបាននិយាយដែរថា រថក្រោះចំនួន ៣០ គ្រឿង, យន្តហោះចម្បាំង ៧ គ្រឿង និង ឧទ្ធម្ភាគចក្រ ៦ គ្រឿង របស់ កងទ័ពរុស្ស៊ី ត្រូវបានបំផ្លាញ។
