«ស្នូរគ្រាប់កាំភ្លើង និងគ្រាប់ផ្ទុះ លាន់ឮតាំងពីទីរួមស្រុកនានានៅភាគខាងកើត ក្បែរតំបន់កាន់កាប់របស់ក្រុមផ្ដាច់ខ្លួនគាំទ្រដោយ រុស្ស៊ី រហូតដល់ រដ្ឋធានី Kiev» នេះបើតាមការឱ្យដឹងពីប្រជាពលរដ្ឋនៅ អ៊ុយក្រែន។
ព័ត៌មាននេះបានលេចឡើងក្រោយពី ប្រធានាធិបតីរុស្ស៊ី ប្រកាសបើកយុទ្ធនាការយោធាពិសេស នៅតំបន់ Donbass និងស្នើឱ្យទាហានអ៊ុយក្រែន ទម្លាក់អាវុធ។
ប្រភពព័ត៌ពីរបស់ Reuters, Fox News និង BBC បានចែករំលែកអំពីករណីផ្ទុះអាវុធនៅកណ្ដាលរដ្ឋធានី Kiev កាលពីព្រឹកមិញ។ ក្រោយមក ក៏មានស្នូរគ្រាប់ផ្ទុះលាន់ឮជាបន្តបន្ទាប់ ប៉ុន្តែ ហាក់នៅឆ្ងាយពីទីក្រុង។ ចំណែកនៅតាមទីរួមស្រុកនានានៅភាគខាងកើតនៃ ប្រទេសអ៊ុយក្រែន ដែលស្ថិតក្បែរតំបន់ដែលក្រុមផ្ដាច់ខ្លួនគ្រប់គ្រង ក៏មានឮស្នូរគ្រាប់ផ្ទុះផងដែរ។
CNN បានរាយការណ៍ថា ស្នូរកញ្ចែប្រកាសអាសន្ន ព្រមានអំពីការវាយប្រហារតាមផ្លូវអាកាស បានលាន់ឡើងកងរំពងនៅក្នុងរដ្ឋធានី Kiev ខណៈដែលអ្នកយកព័ត៌មានរបស់ Guardian និយាយថា ករណីផ្ទុះជាច្រើនបានកើតឡើងនៅក្នុងទីក្រុងមួយចំនួនទៀត ដូចជា Kharkiv, Mariupol, Dnipro, Odessa, Slavayansk និង Kramatorsk ជាដើម។