សហរដ្ឋអាម៉េរិក បានចោទប្រកាន់ថា រុស្ស៊ី-ចិន កំពុងសហការគ្នាដើម្បីបង្កើតសណ្ដាប់ធ្នាប់ពិភពលោកថ្មី «គ្មានសេរីភាព» ហើយបញ្ហា អ៊ុយក្រែន គឺជាផ្នែកមួយនៅក្នុងនោះ។
«យើងគិតថា រុស្ស៊ី និង ចិន ចង់បង្កើតសណ្ដាប់ធ្នាប់ពិភពលោកថ្មី។ ប៉ុន្តែ នេះគឺជាសណ្ដាប់ធ្នាប់ដែលមិនមានសេរីភាព ផ្ទុយពីសណ្ដាប់ធ្នាប់ដែលបណ្ដាប្រទេសក្នុងពិភពលោក បានកសាងក្នុងរយៈពេល ៧ ទសវត្សរ៍កន្លង» អ្នកនាំពាក្យរបស់ក្រសួងការបរទេសអាម៉េរិក Ned Price បានថ្លែងដូច្នេះកាលពីថ្ងៃទី ២៣ កុម្ភៈ។
លោក Price បានអំពាវនាវឱ្យ ចិន បំពេញតួនាទីក្នុងការជំរុញឱ្យ រុស្ស៊ី កាត់បន្ថយភាពតានតឹងនៅក្នុង វិបត្តិអ៊ុយក្រែន។ ចិន បានអំពាវនាវដល់គ្រប់ភាគីដែលពាក់ព័ន្ធនឹង «បញ្ហាអ៊ុយក្រែន» អត់ធ្មត់ និងគោរពឯករាជ្យ អធិបតេយ្យភាព និងបូរណភាពដែនដីរបស់ប្រទេសនានា។
មកដល់ពេលនេះ សហរដ្ឋអាម៉េរិក អង់គ្លេស សហភាពអឺរ៉ុប កាណាដា ជប៉ុន និង អូស្ត្រាលី បានប្រកាសដាក់ទណ្ឌកម្មលើ រុស្ស៊ី ជាបន្តបន្ទាប់ ក្រោយពីសភាជាន់ខ្ពស់របស់ប្រទេសនេះ បានអនុម័តឱ្យបញ្ជូនទ័ពទៅកាន់ Donetsk និង Luhansk នៅភាគខាងកើតរបស់ ប្រទេសអ៊ុយក្រែន ដែលជាដែនដីទើបត្រូវបានលោក ពូទីន ទទួលស្គាល់ឯករាជ្យកាលពីប៉ុន្មានថ្ងៃមុន។
