អាម៉េរិក បញ្ជូនយន្តហោះចម្បាំង F-១៥ និងឧទ្ធម្ភាគចក្រ Apache ចំនួន ៣២ គ្រឿង ទៅកាន់ ប្រទេសប៉ូឡូញ និងបណ្ដាប្រទេសនៅតំបន់សមុទ្របាល់ទិក ក្នុងគ្រាដែល រុស្ស៊ី ពង្រាយកងទ័ពក្បែរ ព្រំដែនអ៊ុយក្រែន ក្រោយពីលោក ពូទីន បានទទួលស្គាល់ដែនដីផ្ដាច់ខ្លួននៅភាគខាងកើតរបស់ អ៊ុយក្រែន។
ប្រធានាធិបតីអាម៉េរិក លោក ចូ បៃដិន កាលពីម្សិលមិញ បានប្រកាសពង្រាយទ័ពនៅ អឺរ៉ុប ជាថ្មី ក្នុងនោះ អង្គភាពជាច្រើនរបស់យោធា ក៏ត្រូវបានពង្រាយនៅភាគខាងកើតរបស់ ណាតូ។ «ខ្ញុំបានបញ្ជាឱ្យពង្រាយកម្លាំង និងសព្វាវុធរបស់ អាម៉េរិក ដែលមានស្រាប់នៅ អឺរ៉ុប ដើម្បីបង្កើតកម្លាំងឱ្យសម្ព័ន្ធមិត្តនៅ តំបន់បាល់ទិក រួមមាន អេស្តូនី, ឡេតូនី និង លីទុយអានី» លោក បៃដិន ឱ្យដឹងដូច្នេះ។
ក្រសួងការពារជាតិអាម៉េរិក ក្រោយមកក៏បានប្រកាសលម្អិតអំពីការចល័តទ័ព ក្នុងនោះ ទាហាន ៨០០ នាក់ នឹងធ្វើដំណើរពី អ៊ីតាលី ទៅកាន់ តំបន់បាល់ទិក ខណៈដែល យន្តហោះចម្បាំង F-៣៥ ចំនួន ៨ គ្រឿង នឹងចល័តពី អាល្លឺម៉ង់ ទៅកាន់តំបន់យុទ្ធសាស្ត្រជាច្រើននៅភាគខាងកើតរបស់ ណាតូ»។
ឧទ្ធម្ភាគចក្រវាយប្រហារ AH-៦៤ Apache ចំនួន ២០ គ្រឿង ដែលស្ថិតនៅក្នុង ប្រទេសអាល្លឺម៉ង់ នឹងហោះទៅកាន់ តំបន់បាល់ទិក ក្នុងគ្រាដែល ១២ គ្រឿងទៀត នឹងហោះពី ប្រទេសក្រិក ទៅកាន់ ប្រទេសប៉ូឡូញ។ លោក បៃដិន ក៏ប្រកាសថា អាម៉េរិក នឹងបន្តផ្គត់ផ្គង់អាវុធការពារខ្លួន ឱ្យទៅ អ៊ុយក្រែន ផងដែរ។
ភាពតានតឹងនៅជុំវិញ «វិបត្តិ អ៊ុយក្រែន» កាន់តែឡើងកម្ដៅខ្លាំង បន្ទាប់ពី ប្រធានាធិបតីប្រធានាធិបតីរុស្ស៊ី លោក វ្លាឌីមៀ ពូទីន កាលពីថ្ងៃទី ២១ កុម្ភៈ បានប្រកាសទទួលស្គាល់ឯករាជ្យរបស់តំបន់ Donetsk និង Luhansk នៅភាគខាងកើតរបស់ ប្រទេសអ៊ុយក្រែន និងបានចុះកិច្ចព្រមព្រៀងសហការគ្នាជាមួយមេដឹកនាំរបស់តំបន់ទាំងពីរនេះ។ កិច្ចព្រមព្រៀងនេះ អនុញ្ញាតឱ្យ រុស្ស៊ី មានសិទ្ធិកសាងមូលដ្ឋានទ័ពនៅ Donetsk និង Luhansk។ លោក ពូទីន ក៏បានបញ្ជាឱ្យក្រសួងការពារជាតិ បញ្ជូនទ័ពទៅតំបន់ទាំងនេះដើម្បី «រក្សាសន្តិភាព»៕