ប្រធានាធិបតីរុស្ស៊ី លោក វ្លាឌីមៀ ពូទីន កាលពីថ្ងៃទី ២១ កុម្ភៈ បានប្រកាសទទួលស្គាល់ឯករាជ្យរបស់តំបន់ Donetsk និង Luhansk ដែលបានផ្ដាច់ខ្លួនចេញពី ប្រទេសអ៊ុយក្រែន និងបានចុះកិច្ចព្រមព្រៀងសហការគ្នាជាមួយមេដឹកនាំរបស់តំបន់ទាំងពីរនេះ។ កិច្ចព្រមព្រៀងនេះ អនុញ្ញាតឱ្យ រុស្ស៊ី មានសិទ្ធិកសាងមូលដ្ឋានទ័ពនៅ Donetsk និង Lugansk។ លោក ពូទីន ក៏បានបញ្ជាឱ្យក្រសួងការពារជាតិ បញ្ជូនទ័ពទៅតំបន់ទាំងនេះដើម្បី «រក្សាសន្តិភាព»។
ភ្លាមៗក្រោយពី រុស្ស៊ី បានទទួលស្គាល់ឯករាជ្យរបស់ Donetsk និង Luhansk ប្រធានាធិបតីអ៊ុយក្រែន លោកវ៉ុលឌីមៀរ ហ្សេលេនស្កាយ ក៏បានប្រកាសថា «មិនខ្លាចអ្នកណាទាំងអស់» ហើយទន្ទឹមនឹងនេះ លោកក៏បានស្នើឱ្យលោកខាងលិច «គាំទ្រឱ្យបានច្បាស់លាស់» ចំពោះ ប្រទេសអ៊ុយក្រែន។
បណ្ដាប្រទេសលោកខាងលិច ក៏បានថ្កោលទោសចំពោះទង្វើនេះរបស់លោក ពូទីន។ ប្រធានាធិបតីអាម៉េរិក ចូ បៃដិន និងប្រធានាធិបតីបារាំង លោក អេម៉ានុយអែល ម៉ាក្រុង រួមនឹង នាយករដ្ឋមន្ត្រីអាល្លឺម៉ង់ លោក អូឡាហ្វ សូល ថ្ងៃនេះ បានធ្វើការរិះគន់លើ ប្រធានាធិបតីរុស្ស៊ី លោក វ្លាឌីមៀ ពូទីន ថា បាន «រំលោភយ៉ាងច្បាស់ក្រឡែត» លើកិច្ចព្រមព្រៀងសន្តិភាព Minsk នៅពេលទទួលស្គាល់ឯករាជ្យរបស់តំបន់ផ្ដាច់ខ្លួនទាំងពីរគឺ Donetsk និង Luhansk នៅភាគខាងកើត នៃ ប្រទេសអ៊ុយក្រែន។
ចំណែកករដ្ឋមន្ត្រីការបរទេសអាម៉េរិក លោក អាន់តូនី ប្ល៊ីងខិន វិញ យល់ថា ការសម្រេចរបស់លោក ពូទីន នាំឱ្យមាន «ប្រតិកម្មយ៉ាងរហ័ស និងពិតប្រាកដ» ហើយថា សហរដ្ឋអាម៉េរិក នឹងសហការជាមួយដៃគូ ដើម្បីអនុវត្តជំហានដែលសមស្រប។
អគ្គលេខាធិការនៃ អង្គការសហប្រជាជាតិ លោក អង់តូនីញ៉ូ ហ្គោទែរ៉េស ក៏បានឱ្យដឹងថា ការសម្រេចចិត្តរបស់ រុស្ស៊ី បាន «រំលោភលើឯករាជ្យ និងអធិបតេយ្យភាពពេញលេញរបស់ អ៊ុយក្រែន» និង «មិនសមស្របទៅនឹងគោលការណ៍ច្បាប់របស់ អង្គការសហប្រជាតិ»៕
