ឯកអគ្គរដ្ឋទូតរបស់ ប្រទេសអ៊ីតាលី លោកស្រី Francesca Tardioli អាយុ ៥៦ ឆ្នាំ ត្រូវបានគេបញ្ជាក់ថា បានបាត់បង់ជីវិត បន្ទាប់ពីធ្លាក់ពីលើជាន់ទី ៣ របស់ផ្ទះគាត់ នៅឯតំបន់ Umbria ភាគខាងជើងនៃ ប្រទេសអ៊ីតាលី។
«យើងពិតជាក្ដុកក្ដួលក្នុងចិត្តនៅចំពោះមុខការលាចាកលោករបស់ Francesca Tardioli និងសូមចូលរួមរំលែកទុក្ខដ៏ក្រៀមក្រំនេះរបស់គ្រួសារនៃសព» ក្រសួងការបរទេសអ៊ីតាលី បានបង្ហោះសារនៅលើទំព័រ Twitter កាលពីថ្ងៃទី ២០ កុម្ភៈ។
លោកស្រី Tardioli ត្រូវបានរកឃើញថា បានស្លាប់នៅខាងក្រៅផ្ទះរបស់ខ្លួន នៅឯទីរួមស្រុក Foligno បន្ទាប់ពីបានធ្លាក់ពីជាន់ទី ៣ កាលពីថ្ងៃទី ២០ កុម្ភៈ។ សារព័ត៌មានរបស់ អ៊ីតាលី AGI រាយការណ៍ថា ការស្លាប់របស់អ្នកការទូតនេះគឺដោយសារបាត់បង់លំនឹងនៅពេលផ្ដេកខ្លួនលើរានរបស់អគារ។ សមត្ថកិច្ចអ៊ីតាលី កំពុងស៊ើបអង្កេតលើករណីនេះ។
លោកស្រី Tardioli បានចូលបម្រើការក្នុងស្ថាប័នការទូតរបស់ អ៊ីតាលី តាំងពីឆ្នាំ ១៩៩១។ លោកស្រី ក្លាយជាឯកអគ្គរដ្ឋទូត របស់ អ៊ីតាលី ប្រចាំ ប្រទេសអូស្ត្រាលី ចាប់ពីខែកញ្ញា ២០១៩។ លោកស្រីចេះស្ទាត់ភាសាអង់គ្លេស បារាំង អាល្លឺម៉ង់ និង អេស្ប៉ាញ ផងដែរ៕
