ទីក្រុងមូស្គូ បានព្រមានថា កងទ័ពអ៊ុយក្រែន អាចបង្កើនការវាយប្រហារក្នុងយប់នេះ ២១ កុម្ភៈ បន្ទាប់ពីកងទ័ពត្រូវបានបញ្ជូនទៅកាន់តំបន់ Donbass កាន់តែច្រើន។
សារព័ត៌មាន TASS ដកស្រង់សម្ដីរបស់អនុប្រធានទីមួយនៃសភាជាន់ទាបរុស្ស៊ី (សភា ឌូម៉ា) លោក Viktor Vodolatsky អះអាងថា កងកម្លាំងប្រដាប់អាវុធរបស់ អ៊ុយក្រែន អាចបង្កើនការវាយប្រហារនៅតំបន់ក្បែរបណ្ដាប្រទេសផ្ដាច់ខ្លួន Donetsk និង Lugansk នៅយប់ថ្ងៃទី ២១ កុម្ភៈ ២០២២។
«Right Sector (គណបក្សជាតិនិយមអ៊ុយក្រែន) និងកងកម្លាំងប្រដាប់អាវុធរបស់ អ៊ុយក្រែន កំពុងចល័តទ័ពកាន់តែច្រើន ទៅកាន់ Lugansk និង Donetsk។ ប្រការនេះបង្ហាញថា ក្នុងអនាគតដ៏ខ្លីខាងមុខ នៅយប់នេះ នឹងមានការវាយប្រហារកាន់តែខ្លាំង» លោក Bodolatsky ថ្លែងដូច្នេះ។
ដែនដីផ្ដាច់ខ្លួន Lugansk (LPR) និង Donetsk (DPR) បានរាយការណ៍ថា មានការវាយប្រហារដោយកាំភ្លើងធំយ៉ាងខ្លាំងក្លាពីកងទ័ពទីក្រុងកៀវ ក្នុងរយៈពេលប៉ុន្មានខែមកនេះ។ ចំណេកភាគី អ៊ុយក្រែន វិញ ក៏បានចោទប្រកាន់កងកម្លាំងផ្ដាច់ខ្លួនថា បានរំលោភបទឈប់បាញ់។
កាលពីថ្ងៃទី ១៨ និង ១៩ កុម្ភៈ ក្រុមផ្ដាច់ខ្លួន LPR និង DPR បានចាប់ផ្ដើមជម្លៀសពលរដ្ឋទៅកាន់តំបន់ Rostov ភាគខាងត្បូងប្រទេសរុស្ស៊ី ដោយសារត្រូវរងការវាយប្រហារពី កងទ័ពអ៊ុយក្រែន និងស្ថានការណ៍កាន់តែតានតឹងនៅតាមបណ្ដោយព្រំដែនមិនផ្លូវការ និងហានិភ័យត្រូវ អ៊ុយក្រែន វាយប្រហារជាផ្លូវការ។
ចំណែក រុស្ស៊ី និងភាគីដែលបានចូលរួមក្នុងកិច្ចព្រមព្រៀង Minsk ២០១៥ ក៏កំពុងប្រឹងប្រែងលើផ្នែកការទូតដើម្បីស្វែងរកដំណោះស្រាយសម្រាប់វិបត្តិនៅ ភាគខាងកើតអ៊ុយក្រែន។ រុស្ស៊ី ក៏បានរំលឹកអំពីទាមទាររបស់ខ្លួន ទៅកាន់ ណាតូ ស្ដីពីការធានាសន្តិសុខពីសំណាក់ក្រុមនេះ។
រីឯ សហរដ្ឋអាម៉េរិក វិញ ឱ្យដឹងថា ប្រភពព័ត៌មានសម្ងាត់របស់ខ្លួន បានអះអាងថា កងទ័ពរុស្ស៊ី កំពុងរៀបចំវាយប្រហារលើ អ៊ុយក្រែន ក្នុងនោះមានទាហានប្រមាណ ១៩០,០០០ នាក់ បានត្រៀមខ្លួនរួចរាល់។
នៅចំពោះមុខការចោទប្រកាន់នេះ រុស្ស៊ី កាលពីថ្ងៃទី ២០ កុម្ភៈ បានអះអាងជាថ្មីថា ប្រទេសនេះមិនមានផែនការឈ្លានពានប្រទេសណាមួយឡើយ៕