រដ្ឋមន្ត្រីការពារជាតិនៃ ប្រទេសប៉ូឡូញ ប្រកាសថា សហរដ្ឋអាម៉េរិក បញ្ជូនយន្តហោះចម្បាំងចំនួន ៨ គ្រឿងទៀត ទៅកាន់មូលដ្ឋានទ័ព Lask ទន្ទឹមនឹង ៨ គ្រឿងដែលបានមកដល់ទីនេះកាលពីសប្ដាហ៍មុន។
«៨ គ្រឿងនេះនឹងចូលរួមក្នុងក្រុម ៨ គ្រឿងផ្សេងទៀត ដែលបានមកដល់ ប៉ូឡូញ កាលពីសប្ដាហ៍កន្លង» រដ្ឋមន្ត្រីក្រសួងការពារជាតិប៉ូឡូញ លោក Mariusz Blaszczak ឱ្យដឹងដូច្នេះកាលពីម្សិលមិញ។
ទីបញ្ជាការប្រចាំតំបន់អឺរ៉ុប របស់ កងទ័ពសហរដ្ឋអាម៉េរិក មិនទាន់មានការអធិប្បាយអ្វីទាក់ទិននឹងព័ត៌មានខាងលើនៅឡើយ។
កងទ័ពអាកាសអាម៉េរិក កាលពីសប្ដាហ៍កន្លង បានប្រកាសថា យន្តហោះចម្បាំង F-១៥C/D ចំនួន ៨ គ្រឿងរបស់ខ្លួន បានចុះចតនៅមូលដ្ឋាន Lask ស្ថិតក្នុងភាគកណ្ដាលរបស់ ប៉ូឡូញ ដែលជាប្រទេសនៅជាយខាងកើតរបស់ ណាតូ (NATO) ជាប់នឹងព្រំដែន អ៊ុយក្រែន បេឡារូស និងដែនដីឯនាយសមុទ្រ Kaliningrad របស់ រុស្ស៊ី។
សហរដ្ឋអាម៉េរិក កំពុងបន្ថែមកម្លាំង និងផ្លាស់ប្ដូរទីតាំងបោះទ័ពរបស់ទាហាន ៦,០០០ នាក់ នៅ ប៉ូឡូញ រ៉ូម៉ានី និង អាល្លឺម៉ង់ ក្នុងគ្រាដែល សហរដ្ឋអាម៉េរិក និងសម្ព័ន្ធមិត្តនៅ អឺរ៉ុប ចោទប្រកាន់ រុស្ស៊ី ថា មានផែនការវាយប្រហារ អ៊ុយក្រែន បន្ទាប់ពី រុស្ស៊ី បានបញ្ជូនទាហានជាង ១០០,០០០ នាក់ រួមនឹងសព្វាវុធទំនើបៗ ចូលទៅក្បែរព្រំដែនប្រទេសជិតខាង ប៉ុន្តែ រុស្ស៊ី បានបដិសេធការចោទប្រកាន់នេះ។
មុនការចល័តទ័ពរបស់ រុស្ស៊ី សហរដ្ឋអាម៉េរិក បានបញ្ជូននាវាចម្បាំង និងយន្តហោះទម្លាក់គ្រាប់បែក B-១B ទៅចូលរួម «សមយុទ្ធក្រៅគម្រោង» របស់ ណាតូ នៅ សមុទ្រខ្មៅ ជាមួយនឹងសមាជិកចំនួន ២ គឺ តួកគី និង រ៉ូម៉ានី រួមនឹង អ៊ុយក្រែន ផងដែរ។
ការចល័តទ័ពរបស់ រុស្ស៊ី សហរដ្ឋអាម៉េរិក ក៏ដូចជាកម្លាំងដទៃក្នុងតំបន់ បាន និងកំពុងធ្វើឱ្យស្ថានការណ៍នៃជម្លោះប្រដាប់អាវុធរវាង កងទ័ពអ៊ុយក្រែន និងក្រុមផ្ដាច់ខ្លួននៅភាគខាងកើត ផ្ទុះឡើងជាថ្មី បន្ទាប់ពីស្ងប់ស្ងាត់បានមួយរយៈពេល៕