មនុស្សម្នាមានការភ្ញាក់ផ្អើលយ៉ាងខ្លាំង នៅពេលស្ត្រីម្នាក់ទម្លាក់កូនស្រីតូច ចូលទៅក្នុងទ្រុងរបស់ខ្លាឃ្មុំ ពីកម្ពស់ ៥ ម៉ែត្រ។
យោងតាមទំព័រ RT (រុស្ស៊ី) ហេតុការណ៍ដ៏គួរឱ្យរន្ធត់នេះត្រូវបានកាមេរ៉ាសុវត្ថិភាពថតបាននៅឯសួនសត្វមួយក្នុង រដ្ឋធានីតាស្កិន (Tashken) របស់ ប្រទេសអ៊ូសបេគីស្ថាន (Uzbekistan) កាលពីថ្ងៃទី ២៩ មករា។
សកម្មភាពដែលថតបានដោយកាមេរ៉ាសុវត្ថិភាពបង្ហាញថា ស្ត្រីម្នាក់លើកកូនឡើងដាក់លើរបងរបស់ទ្រុងខ្លាឃ្មុំ ហើយក្រោយមកក៏រុញក្មេងស្រីនេះឱ្យធ្លាក់ទៅក្នុងប្រឡាយទឹកកម្ពស់ ៥ ម៉ែត្រ។
ខ្លាឃ្មុំ Zuzu ហាក់មានការភ្ញាក់ផ្អើលខ្លាំង និងបានប្រញាប់ចុះទៅពិនិត្យមើលកូនក្មេងនោះ។ ពេលចូលទៅដល់ ខ្លាឃ្មុំបានហិតក្លិន រួចក៏ចាកចេញទៅ។
https://www.youtube.com/watch?v=aSemK3xLWnU
នៅចំពោះមុខហេតុការណ៍នេះ មនុស្សម្នានៅជុំវិញនាំគ្នាស្រែកឱ្យជួយ ភ្លាមនោះបុគ្គលិកសួនសត្វក៏មកដល់កន្លែងកើតហេតុ ហើយនាំខ្លាឃ្មុំទៅឆ្ងាយ និងលើកបីក្មេងនេះចេញពីកន្លែងគ្រោះថ្នាក់។
ក្មេងស្រីមិនត្រូវបានខ្លាឃ្មុំវាយប្រហារក៏ពិតមែន ប៉ុន្តែ ក៏ត្រូវបញ្ជូនទៅកាន់មន្ទីរពេទ្យ ព្រោះតែរងរបួសដោយសារធ្លាក់ពីទីខ្ពស់។
រដ្ឋអាជ្ញានៃតុលាការរបស់ ប្រទេសអ៊ូសបេគីស្ថាន បានបើកការស៊ើបអង្កេតលើករណីនេះ ដោយសង្ស័យថា ស្ត្រីនេះមានចេតនាសម្លាក់មនុស្សម្នាក់ដែលមិនមានលទ្ធភាពទប់ទល់។ ប្រសិនបើត្រូវបានកាត់ទោស ស្ត្រីរូបនេះអាចត្រូវប្រឈមនឹងការជាប់ពន្ធនាគារ ១៥ ឆ្នាំ។
សមត្ថកិច្ចបានឱ្យដឹងថា ស្ត្រីវ័យ ៣០ ឆ្នាំរូបនេះ មានបញ្ហាផ្លូវចិត្ត ព្រោះតែបែកបាក់គ្រួសារ។ ស្វាមីរបស់គាត់ បានទៅធ្វើការនៅ ប្រទេសរុស្ស៊ី៕