ឯកអគ្គរដ្ឋទូតចិន បានចោទប្រកាន់ សហរដ្ឋអាម៉េរិក ថា កំពុងញុះញង់ កោះតៃវ៉ាន់ ឱ្យទាមទារឯករាជ្យ និងបានព្រមានថា ឥរិយាបថនេះធ្វើឱ្យហានិភ័យផ្ទុះជម្លោះប្រដាប់អាវុធកាន់តែខ្ពស់។
«បញ្ហា កោះតៃវ៉ាន់ គឺជាចំណុចក្ដៅសំខាន់បំផុតរវាង ចិន និង អាម៉េរិក។ បើសិនជា អាជ្ញាធរកោះតៃវ៉ាន់ ក្រោមការញុះញង់របស់ អាម៉េរិក បន្តតាមរកឯករាជ្យ នោះជម្លោះប្រដាប់អាវុធរវាងមហាអំណាចចិន និង អាម៉េរិក នឹងមានហានិភ័យកាន់តែខ្ពស់» ឯកអគ្គរដ្ឋទូតចិន ប្រចាំ សហរដ្ឋអាម៉េរិក លោក Qin Gang បានប្រាប់អ្នកសារព័ត៌មានដូច្នេះ កាលពីថ្ងៃទី ២៨ មករា។
មតិរបស់លោក Gang ត្រូវបានលើកឡើងបន្ទាប់ពី ទីក្រុងតៃប៉ិ និង វ៉ាស៊ីងតោន បង្ហាញឥរិយាបថស្និទ្ធស្នាលមួយចំនួន។ អនុប្រធានាធិបតីតៃវ៉ាន់ លោក Lai Ching-te កាលពីថ្ងៃទី ២៥ មករា បានឆៀងចូលជួបពិភាក្សាជាមួយ តំណាងរាស្ត្រអាម៉េរិក យ៉ាងតិច ១៧ រូប ក្នុងគ្រាដែលលោកឆ្លងកាត់ប្រទេសនេះ ឆ្ពស់ទៅកាន់ ហុងឌូរ៉ាស បើទោះជាមុននោះមានការព្រមានពីសំណាក់ ទីក្រុងប៉េកាំង។
ពីរថ្ងៃក្រោយមក អនុប្រធានាធិបតីអាម៉េរិក លោកស្រី Kamala Harris បានឱ្យដឹងថា លោកស្រីបានពិភាក្សាជាមួយលោក Lai «អំពីចំណាប់អារម្មណ៍រួមក្នុងតំបន់»។ សមភាគីទាំងពីរសុទ្ធតែទៅកាន់ ហុងឌូរ៉ាស ដើម្បីចូលរួមពិធីស្បថចូលកាន់តំណែងរបស់ប្រធានាធិបតីថ្មី លោកស្រី Xiomara Castro។
ចាប់ពីឆ្នាំ ២០២១ មានអតីតមន្ត្រី និងមន្ត្រីជាន់ខ្ពស់ រួមនឹងតំណាងរាស្ត្ររបស់ សហរដ្ឋអាម៉េរិក ជាច្រើនក្រុម បានទៅកាន់ទឹកដីនៃ កោះតៃវ៉ាន់ និងជួបពិភាក្សាជាមួយប្រធានាធិបតី Tsai Ing-wen និងក្រុមមន្ត្រីរបស់ កោះនេះ ធ្វើឱ្យអាជ្ញាធរចិនដីគោក មានការខឹងយ៉ាងខ្លាំង និងព្រមានជាបន្តបន្ទាប់ទៅលើទំនាក់ទំនងនេះ។
សហរដ្ឋអាម៉េរិក ទទួលស្គាល់គោលនយោបាយ «ចិនតែមួយ» ខណៈដែល ចិនដីគោក ចាត់ទុក កោះតៃវ៉ាន់ ជាផ្នែកមួយនៃទឹកដីរបស់ខ្លួនដែលរង់ចាំតែការបង្រួបបង្រួមប៉ុណ្ណោះ។ ប៉ុន្តែ ទីក្រុងវ៉ាស៊ីងតោន នៅតែសន្យាជួយ កោះតៃវ៉ាន់ ក្នុងការរក្សាសិទ្ធិម្ចាស់ការ ដោយយោងតាមច្បាប់ទំនាក់ទំនងជាមួយ តៃវ៉ាន់ ឆ្នាំ ១៩៧៩ និងជាអ្នកផ្គត់ផ្គង់អាវុធធំជាងគេរបស់ កោះនេះ៕
