នៅក្នុងជំហានដ៏អស្ចារ្យនៃវេជ្ជសាស្ត្រក្នុងការបង្កើតអវយវៈឡើងវិញ កង្កែបមួយក្បាលបានដុះជើងដែលបានដាច់ទាំងស្រុងរបស់វាឡើងវិញ នៅពេលអ្នកវិទ្យាសាស្ត្រព្យាបាលដោយឱសថពិសេស។
សារព័ត៌មាន Guardian បានចុះផ្សាយថា ក្រុមអ្នកវិទ្យាសាស្ត្របានប្រើប្រាស់ពេលវេលា ២៤ ម៉ោង ក្នុងការព្យាបាលកង្កែបអាហ្វ្រិក ដែលជាធម្មតាមិនអាចដុះអវយវៈដែលដាច់ឡើងវិញបាន។ ជាលទ្ធផល ជើងដែលបានដាច់របស់វាបានដុះឡើងវិញក្រោយរយៈពេល ១៨ ខែ បន្ទាប់ពីបានព្យាបាល។
ជោគជ័យនេះនាំមកនូវក្ដីសង្ឃឹមដែលថា អនាគត ក្រុមវេជ្ជបណ្ឌិតអាចប្រើប្រាស់វិធីសាស្ត្រនេះនៅលើមនុស្ស។
លោក Nirosha Murugan នៃសាកលវិទ្យាល័យ Tufts (សហរដ្ឋអាម៉េរិក) ដែលជាអ្នកស្រាវជ្រាវរបស់ក្រុមខាងលើ ឱ្យដឹងថា៖ «ដោយគ្រាន់តែព្យាបាលក្នុងរយៈពេលខ្លី ដើម្បីចាប់ផ្ដើមដំណើរការអូសបន្លាយច្រើនខែ យើងអាចជំរុញសមត្ថភាពបង្កើតឡើងវិញរបស់កង្កែប ហើយទំនងជាអាចធ្វើបាននៅលើសត្វមួយចំនួនផ្សេងទៀត»។
នៅក្នុងការពិសោធថ្មីបំផុតដែលត្រូវបានចុះផ្សាយលើទស្សនាវដ្ដីវិទ្យាសាស្ត្រ Science Advances នេះ ក្រុមអ្នកវិទ្យាសាស្ត្របានកាត់ជើងខាងក្រោយរបស់កង្កែបមួយក្បាល និងរុំរបួសក្នុងថង់ silicon ដែលផ្ទុកថ្នាំព្យាបាលពិសេសដែលមាន ៥ សមាសធាតុ។ សមាសធាតុនិមួយៗ មានគោលដៅដោយឡែក ដូចជា កាត់បន្ថយការរលាក ឆ្លងរោគ និងផលិត collagen ដើម្បីទប់ស្កាត់បញ្ហាស្លាកស្នាមរីកធំ និងសារធាតុជួយជំរុញការរីកលូតលាស់របស់សរសៃវិញ្ញាណ សរសៃឈាម និងសាច់ដុំថ្មីផងដែរ។
ការពិសោធនេះត្រូវបានធ្វើឡើងវិញនៅលើកង្កែបរាប់សិបក្បាល ហើយជាលទ្ធផល កង្កែបជាច្រើនក្បាល បានដុះអវយវៈមកវិញ។
លោក Bob Lanza ប្រធានអង្គការវេជ្ជសាស្ត្រ Astellas បានរៀបរាប់ថា របកគំហើញខាងលើនេះគឺជាការរីកចម្រើនដ៏អស្ចារ្យ និងជាសមិទ្ធិផលដ៏គួរឱ្យភ្ញាក់ផ្អើល៕