សេតវិមានអះអាងថា ព័ត៌មានរបស់ CNN ដែលផ្សាយថា «ប្រធានាធិបតី បៃដិន ព្រមានថា រុស្ស៊ី ហាក់ប្រាកដជាបើកការវាយប្រហារលើ ប្រទេសអ៊ុយក្រែន» នៅក្នុងខែកុម្ភៈ គឺជា «ព័ត៌មានមិនពិត»។
សារព័ត៌មាន CNN ថ្ងៃនេះ បានដកស្រង់សម្ដីរបស់មន្ត្រីជាន់ខ្ពស់ អ៊ុយក្រែន សុំមិនបញ្ចេញឈ្មោះ ឱ្យដឹងថា ប្រធានាធិបតីអាម៉េរិក លោក ចូ បៃដិន កាលពីថ្ងៃទី ២៧ មករា បានពិភាក្សាតាមទូរស័ព្ទជាមួយសមភាគីអ៊ុយក្រែន គឺលោក វ៉ូឡូឌីមារ ហ្សេឡែនស្គី (Volodymyr Zelensky)។ មន្ត្រីរូបនេះថ្លែងថា លោក បៃដិន បានព្រមានទៅលោក វ៉ូឡូឌីមារ ហ្សេឡែនស្គី ថា រុស្ស៊ី អាច «ជិតបើកការវាយប្រហារ» ហើយសេណារីយ៉ោនេះ ហាក់ប្រាកដជានឹងកើតឡើងនៅក្នុងខែកុម្ភៈ។
មន្ត្រីខាងលើបន្តថា លោក បៃដិន ថ្លែងថា ទីក្រុង Kiev នឹងត្រូវ «ពេញដោយ» កងកម្លាំងរុស្ស៊ី ព្រោះថា កងទ័ពរុស្ស៊ី «អាចស្វែងរកវិធីចូលកាន់កាប់ទឹកដី» របស់ អ៊ុយក្រែន។
ទោះជាយ៉ាងណាក៏ដោយ អ្នកនាំពាក្យនៃក្រុមប្រឹក្សាសន្តិសុខជាតិអាម៉េរិក អេមីលី ហ័ន (Emily Horne) បានច្រានចោលការចុះផ្សាយរបស់ CNN។ «ប្រភពព័ត៌មានមិនបញ្ចេញឈ្មោះនានាកំពុង «ធ្វើឱ្យបែកធ្លាយ» ព័ត៌មានមិនពិត» លោកស្រី អេមីលី ហ័ន បញ្ជាក់ដូច្នេះ។
ចំណែក សឺជី នីគីហ្វរ៉ូវ (Sergii Nykyforov) ដែលជាអ្នកនាំពាក្យរបស់ប្រធានាធិបតី វ៉ូឡូឌីមារ ហ្សេឡែនស្គី វិញ ក៏បានហៅព័ត៌មានដែលសុំមិនបញ្ចេញឈ្មោះនោះថា «សុទ្ធតែមិនមែនជាការពិត»។
នៅក្នុងកិច្ចពិភាក្សាជាមួយប្រធានាធិបតីអាម៉េរិក កាលពីម្សិលមិញ ប្រធានាធិបតី វ៉ូឡូឌីមារ ហ្សេឡែនស្គី បានអះអាងជាថ្មីថា ការគំរាមកំហែងពី រុស្ស៊ី គឺជា «គ្រោះថ្នាក់ ប៉ុន្តែ ជាការស្រមើស្រមៃ» ហើយថា អ៊ុយក្រែន ក៏មិនប្រាកដថា ការវាយប្រហារនឹងកើតឡើង ឬអត់នោះដែរ ខណៈដែលលោក បៃដិន បញ្ជាក់ថា សហរដ្ឋអាម៉េរិក ត្រៀមខ្លួនរួចរាល់ហើយក្នុងការរួមដៃជាមួយសម្ព័ន្ធមិត្ត និងដៃគូសហការ ដើម្បី «ប្រតិកម្មដាច់ខាត បើសិន រុស្ស៊ី បើកការវាយប្រហារលើ អ៊ុយក្រែន»។
សហរដ្ឋអាម៉េរិក និងបណ្ដាប្រទេសលោកខាងលិច បានចោទប្រកាន់ថា ទាហានជាង ១០០,០០០ នាក់ របស់ រុស្ស៊ី ដែលកំពុងធ្វើសមយុទ្ធក្បែរព្រំដែនជាប់ ទឹកដីអ៊ុយក្រែន បានធ្វើឱ្យ អាជ្ញាធរអ៊ុយក្រែន និង NATO មានការបារម្ភថា រុស្ស៊ី កំពុងរៀបផែនការបើកការវាយប្រហារប្រទេសជិតខាងនេះ។ រុស្ស៊ី ជាញឹកញាប់ បានច្រានចោលការចោទប្រកាន់របស់ សហរដ្ឋអាម៉េរិក និងក្រុមប្រទេសលោកខាងលិច៕
