ព្រះនាង Fadzilah រួមនឹងស្វាមី Al-Hashimi បានរៀបអភិសេកជាមួយគ្នាដោយប្រើពេល ១០ ថ្ងៃ ក្នុងនោះមានរាជពិធីតាមប្រពៃណីជាច្រើនត្រូវបានប្រារព្ធឡើង។
ព្រះនាងរបស់រាជវង្សព្រុយណេ Fadzilah Lubabul Bolkiah ព្រះជន្ម ៣៦ វស្សា រួមនឹងស្វាមី Abdullah Nabil Mahmoud Al-Hashimi ថ្ងៃនេះបានបញ្ចប់ពិធីអភិសេកដែលអូសបន្លាយពេល ១០ ថ្ងៃ ដោយចាប់ផ្ដើមពីថ្ងៃទី ១៦ មករា។
ក្នុងរូបថតខាងលើ គឺជាក្រុមអ្នកកំដររបស់កូនកំលោះ នាំបណ្ណាការមកកាន់រាជវាំង Nurul Iman កាលពីថ្ងៃទី ១៨ មករា។ បណ្ណាការដែលបាននាំយកពីគ្រួសារខាងប្រុសរួមមានដូចជាក្រណាត់ប្រណិត គ្រឿងអលង្ការ និងវត្ថុមានតម្លៃដទៃទៀត។
កាំភ្លើងធំចំនួន ១៧ គ្រាប់ត្រូវបានបាញ់ដើម្បីបង្ហាញថា រាជវាំងព្រុយណេបានទទួលយកបណ្ណាការពីគ្រួសារកូនកំលោះរួចហើយ។
ស្វាមីរបស់ព្រះនាង Fadzilah គឺលោក Al-Hashhimi ក៏ស្លៀកឈុតប្រពៃណី និងទទួលពរជ័យពីសំណាក់រាជវាំង។
ក្នុងពិធីមួយនៅថ្ងៃទី ១៨ មករា ព្រះនាង Fadzilah គ្រងឈុតប្រពៃណីពណ៌ក្រហម និងទ្រង់គ្រឿងអលង្ការជាច្រើនធ្វើអំពីមាស។ ព្រះនាងលាព្រះហស្តទាំងពីរលើខ្នើយ ទទួលយកពរជ័យពីសមាជិករាជវង្ស។
ថ្ងៃទី ២៣ មករា ព្រះនាង Fadzilah និងស្វាមី គោរពធ្វើតាមពិធី Istiadat Bersanding Diraja ដែលជាព្រឹត្តិការណ៍សំខាន់នៅក្នុងពិធីអភិសេក។
ព្រះនាង និងស្វាមី គ្រងឈុតប្រពៃណីពណ៌ស នៅក្នុងពិធី Istiadat Bersanding Diraja។
ព្រះនាង និងស្វាមី ឱនលំទោនកាយគោរពដល់មហាក្សត្រី Duli Raja Isteri ជាអគ្គមហេសីរបស់ព្រះបាទ Darussalam Haji Hassanal Bolkiah។ មាតារបស់ព្រះនាង Fadzilah ព្រះនាម Mariam Abdul Aziz ជាមហេសីទីពីររបស់មហាក្សត្រព្រុយណេ។
ថ្ងៃទី ២៥ មករា ដែលជាថ្ងៃចុងក្រោយនៃពិធីរៀបអភិសេក ព្រះនាង Fadzilah និងស្វាមីបានចូលរួមពិធីជប់លៀងរបស់រាជវាំង ដើម្បីជាកិច្ចបង្ហើយពិធីអភិសេករយៈពេល ១០ថ្ងៃ។
ព្រះនាង Fadzilah និងស្វាមី ថតរូបជាមួយសមាជិករាជវង្សព្រុយណេ ក្នុងថ្ងៃចុងក្រោយនៃពិធីរៀបអភិសេក។
ព្រះនាង Fadzilah និងស្វាមី Al-Hashhimi គង់នៅទីកណ្ដាលនៃពិធីជប់លៀង ចំណែកនៅសងខាងគឺមហាក្សត្រ និងអគ្គមហេសី៕
