ប៉ូលិសឥណ្ឌូណេស៊ី បានឱ្យដឹងថា បានរកឃើញសាកសពចំនួន ១៩ នាក់ នៅក្នុងក្លឹបរាត្រីមួយក្នុងទីក្រុង Sorong នៃខេត្ត West Papua នាព្រឹកព្រលឹមថ្ងៃទី ២៥ មករា បន្ទាប់ពីមានហេតុការណ៍ប៉ះទង្គិចគ្នារវាងមនុស្ស ២ ក្រុម និងករណីអគ្គិភ័យ។
យោងតាមអ្នកនាំពាក្យរបស់ប៉ូលិសខេត្ត West Papua ហេតុការណ៍ប៉ះទង្គិចគ្នានេះបានកើតឡើងនៅឯក្លឹបរាត្រី Double O Executive Karaoke & Club កាលពីវេលាទៀបភ្លឺនៃថ្ងៃទី ២៤ មករា ឈានចូលថ្ងៃទី ២៥ មករា។
ការប៉ះទង្គិចគ្នារវាងមនុស្ស ២ ក្រុមនៅទីនេះ បានបណ្ដាលមនុស្សម្នាក់ស្លាប់ ហើយក្រោយមក អំពើហិង្សានៅតែបន្ត រហូតដល់កើតមានអគ្គិភ័យ នាំឱ្យមានអ្នកស្លាប់សរុបឡើងដល់ ១៩ នាក់។ ក្រៅពីអ្នកស្លាប់ក៏នៅមានមនុស្សជាច្រើននាក់ផ្សេងទៀតត្រូវរងរបួស។
រូបភាពដែលបានផ្សាយលើកញ្ចក់ទូរទស្សន៍ បង្ហាញថា រថយន្តជាច្រើនគ្រឿងដែលស្ថិតនៅខាងក្រៅក្លឹបនេះក៏ត្រូវបានគេដុតបំផ្លាញផងដែរ៕
