(តុងហ្គា)-បុរសពិការម្នាក់ អាយុ ៥៧ ឆ្នាំ បានហែលទឹកសមុទ្រចម្ងាយប្រហែល ៧.៥ គីឡូម៉ែត្រ ក្នុងរយៈពេល ២៧ ម៉ោង មុននឹងបានមកដល់ឆ្នេរ បន្ទាប់ពីត្រូវបានរលកយក្សដែលកើតឡើងដោយសារបន្ទុះភ្នំភ្លើងកាលពីសប្ដាហ៍មុន កួចចូលសមុទ្រ។
Lisala Folau រស់នៅលើកោះ Atata ត្រូវរលកយក្សកួចចូលសមុទ្រកាលពីថ្ងៃទី ១៥ មករា ក្រោយពីហេតុការណ៍ផ្ទុះភ្នំភ្លើង Hunga Tonga-Hunga Ha’apai បានកើតឡើង។ បុរសនេះឱ្យដឹង ប្អូនគាត់បានប្រាប់អំពីរលកយក្សនៅពេលកំពុងលាបថ្នាំផ្ទះ ភ្លាមនោះ រលកធំៗក៏បានបោកមកដល់។
«ខ្ញុំបោះបង់គ្រប់យ៉ាង និងព្យាយាមរត់គេចខ្លួន ប៉ុន្តែ ខ្ញុំគឺជាជនពិការ។ ខ្ញុំមិនអាចដើរបានដូចគេ ជើងទាំង ២ របស់ខ្ញុំមិនដំណើរការតាមចិត្តចង់បាន។ សូម្បីតែក្មេងតូចក៏អាចដើរលឿនជាងខ្ញុំ» លោក Folau រៀបរាប់ដូច្នេះ។
Folau បានឡើងដើមឈើដើម្បីសុវត្ថិភាព ប៉ុន្តែ នៅពេលចុះមកវិញ ក៏ស្រាប់តែរលកធំមួយទៀតបានបោកបក់មកដល់ ហើយក៏បានកួចគាត់ទៅកាន់សមុទ្រ។ លោកនិយាយថា៖ «ខ្ញុំអណ្ដែតលើផ្ទៃទឹក ចំណែករលកធំៗក៏ចេះតែបោកមកកាន់ខ្ញុំ»។ នៅពេលស្ថិតលើផ្ទៃទឹកសមុទ្រ Folau បានឃើញនាវារបស់ប៉ូលិសដែលឆ្លងកាត់ក្បែរនោះ គាត់បានសុំឱ្យជួយ ប៉ុន្តែ មនុស្សនៅលើនាវានោះមិនបានឃើញគាត់ឡើយ។
លោក Folau ត្រូវប្រឹងប្រែងអស់ពីសមត្ថភាពដើម្បីហែលឱ្យដល់ឆ្នេរ ព្រោះតែគិតដល់គ្រួសារ។ ក្រោយការតស៊ូជិត ២៧ ម៉ោង ឆ្លងកាត់ចម្ងាយផ្លូវ ៧.៥ គីឡូម៉ែត្រ លោកក៏បានហែលដល់ឆ្នេររបស់កោះ Tongatapu នៅវេលាម៉ោងប្រហែល ២២ យប់ នៃថ្ងៃទី ១៦ មករា។ ពេលហែលដល់ឆ្នេរ Folau ក៏បានសុំឱ្យបុរសម្នាក់ជួយទូរស័ព្ទទៅកាន់គ្រួសារគាត់។
កូនស្រីរបស់លោក Folau បានបង្ហោះរឿងរ៉ាវនៃហេតុការណ៍របស់ឪពុកខ្លួននៅលើបណ្ដាញសង្គម។ នាងបានរៀបរាប់ថា ពេញមួយយប់ គ្រួសាររបស់នាងរន្ធត់ចិត្តខ្លាំងណាស់នៅពេលដឹងថា ឪពុកនាងបានបាត់ខ្លួន ប៉ុន្តែ ក៏មានមោទកភាពបំផុតចំពោះការតស៊ូ និងភាពក្លាហានរបស់ឪពុក។
រឿងរ៉ាវរបស់លោក Folau ក៏ត្រូវបានអ្នកលេងបណ្ដាញសង្គមនៅ តុងហ្គា ចែករំលែកតៗគ្នា។ Reuters មិនទាន់អាចបញ្ជាក់បានអំពីការរៀបរាប់របស់លោក Folau នៅឡើយ។
ភ្នំភ្លើង Hunga Tonga-Hunga Ha’apai បានផ្ទុះកាលពីថ្ងៃទី ១៥ មករា ២០២២ បង្កើតបានជាករណីផ្ទុះ «ពាន់ឆ្នាំមានម្ដង» ដោយវាមានកម្លាំងប្រហាក់ប្រហែលនឹងគ្រាប់បែកនុយក្លេអែរ ៦៦៦ គ្រាប់បូកចូលគ្នា នាំឱ្យមានផេះ ធូលី ខ្ពស់កប់អាកាស និងធ្វើឱ្យមានរលកយក្សវាយប្រហារលើ ប្រទេសតុងហ្គា សម្លាប់មនុស្ស ៣ នាក់ ចំណែកការខូចខាត់ទ្រព្យសម្បត្តិ ក៏ត្រូវគេជឿថា ច្រើនរាប់មិនអស់៕
