(កូរ៉េខាងត្បូង)-យន្តហោះចម្បាំង F-5E របស់កងទ័ពអាកាសកូរ៉េខាងត្បូង ដែលហោះចេញពីខេត្ត Gyeonggi ក៏បានជ្រុលទៅបុកភ្នំ បណ្ដាលឱ្យអ្នកបើកបរត្រូវស្លាប់នៅនឹងកន្លែង ព្រោះតែបរាជ័យក្នុងការដំណើរការឆត្រយោង។
ក្រសួងការពារជាតិរបស់ កូរ៉េខាងត្បូង ថ្ងៃនេះ បានឱ្យដឹងថា នៅពេលយន្តហោះចម្បាំង F-5E បានហោះឡើងពីមូលដ្ឋាន Suwon ភ្លើងសញ្ញាដែលប្រាប់អំពីបញ្ហាម៉ាស៊ីនទាំងពីររបស់យន្តហោះក៏បានឆេះឡើង ហើយយន្តហោះក៏ចាប់ផ្ដើមដាំក្បាលចុះ។
យន្តហោះចម្បាំងនេះបានបុកចំកំពូលភ្នំដែលស្ថិតក្នុងទីក្រុង Hwaseong នៃខេត្ត Gyeonggi ចម្ងាយប្រហែល ៤០ គីឡូម៉ែត្រ ទៅទិសខាងកើតនៃ រដ្ឋធានី Seoul ពោលគឺប្រមាណជា ២ នាទីប៉ុណ្ណោះ បន្ទាប់ពីបានហោះឡើង។ អ្នកបើកបរយន្តហោះនេះបានព្យាយាមចុចគន្លឹះឆត្រយោងដើម្បីរំដោះខ្លួន ប៉ុន្តែមិនបានសម្រេច ហើយក៏បានបាត់បង់ជីវិត។
បច្ចុប្បន្ន កងទ័ពអាកាសរបស់ កូរ៉េខាងត្បូង កំពុងបើកការស្រាវជ្រាវលើករណីគ្រោះថ្នាក់នេះ។
